As organizacións agrarias rexeitan reunirse coa ministra de Seguridade Social
As organizacións agrarias rexeitan reunirse coa ministra de Seguridade Social
Os representantes do agro foran convocados este próximo martes a unha reunión con Elma Saiz, pero alegan motivos de axenda, xa que resulta "moi complicado neste momento tan tenso"
A reunión que tiña previsto manter a ministra de Inclusión, Seguridade Social e Migracións, Elma Saiz, coas organizacións agrarias o vindeiro martes 13 de febreiro foi suspendida mentres continúan as protestas do sector primario.
O Ministerio de Inclusión, Seguridade Social e Migracións sinalou este venres que convocara ás asociacións do sector agrario para ter unha reunión o martes no marco das súas reivindicacións, pero dita oferta "foi declinada".
"Lamentamos non atopar a mesma predisposición por parte dos nosos interlocutores, xa que cremos firmemente que as mesas de diálogo son o mellor marco posible para expoñer os diferentes puntos de vista e alcanzar consensos", apuntou o Ministerio nun comunicado.
Fontes das organizacións agrarias explicaron a Efe que recibiran a convocatoria, pero que finalmente se aprazou o encontro por problemas de axenda, xa que resulta "moi complicado neste momento tan tenso".
Os agricultores levan días protestando pola crise que atravesan e reclaman unha flexibilización das normas comunitarias, menos burocracia e a imposición das mesmas regras de produción europeas ás importacións de produtos agrícolas de terceiros países, entre outras demandas.
Onte xoves, Saiz, anunciou que convocara ás organizacións agrarias o vindeiro martes para abordar o "problema da man de obra" no campo, onde se perderon 100.000 empregos en dez anos.
O Ministerio de Inclusión afirmou este venres que, "desde o primeiro minuto, baseou a súa forma de acción no diálogo construtivo, a escoita activa e a man tendida para chegar a acordos".
Puxo de exemplo a convocatoria da Conferencia Sectorial de Migracións e da Mesa de Diálogo Social, coas que se analizaron problemas complexos "desde diferentes sensibilidades e puntos de vista para alcanzar consensos e acordos que redunden en beneficio das persoas".
"Esta é a única forma que entendemos para xestionar os conflitos sociais e a única fórmula que concibimos para facer política que dea solución aos problemas da xente", sostiveron as fontes do Goberno.
