As protestas dos traballadores de Vitrasa obrigan a Caballero a saír escoltado dun acto

Os traballadores de Vitrasa, concesionaria do bus urbano de Vigo, trasladaron este martes as súas protestas ás portas do museo Marco, onde se celebrou o acto institucional con motivo do Día da Constitución. Os empregados increparon o alcalde, Abel Caballero, á súa saída do edificio, perseguíndoo mentres o rexedor camiñaba pola rúa lateral do museo, escoltado por axentes da Policía Nacional.

Os empregados da concesionaria, que están en folga indefinida desde o pasado 25 de novembro, concentráronse pola mañá ante o Concello, antes de trasladarse á entrada do museo Marco, onde a Federación de Asociacións de Veciños (Favec) convocara unha concentración para reclamar unha saída ao conflito do bus urbano.

Os efectivos da Policía Nacional blindaron a contorna do Marco durante a celebración do acto do Día da Constitución, presidido polo delegado do Goberno en Galicia, Pedro Blanco, e que contou coa presenza de numerosas autoridades, entre elas Abel Caballero.

"Menos luces, máis autobuses", "Caballero vendeobreros" ou "Vitrasa culpable, alcalde responsable" eran algúns das frases que se escoitaban no exterior por parte dos traballadores de Vitrasa e representantes de CIG, UXT, USO e CC. OO. que tamén se desprezaron ata o lugar.

Corenta minutos despois de finalizar o acto, o alcalde vigués saíu do edificio acompañado por Pedro Blanco e Abel Losada. Caballero dirixiuse cara a un lateral do Marco, mentres os traballadores o acompañaban rúa arriba, contidos por un cordón de valos e de axentes de Policía.

O coche oficial esperaba o alcalde na parte traseira do museo. Con todo, Caballero negouse a empregalo e seguiu camiñando, á vez que se dirixía aos traballadores levantando unha man cos dedos formando o 'V'. Finalmente, no cruzamento coa rúa Progreso, virou e encamiñouse cara ao Concello, mentres os traballadores eran retidos pola policía e seguían increpándoo ao berro de "lercho".

Durante estes intres a policía puido identificar tres persoas durante as protestas, e propuxo a unha delas para sanción polo lanzamento dun papel ao paso do alcalde. Con todo, os tres suxeitos non tiñan nada que ver coa protesta, uníronse ao grupo ao ver que increpaban o alcalde.

Esta é a segunda vez en menos dun mes que Abel Caballero protagoniza un enfrontamento cos traballadores de Vitrasa. O pasado 14 de novembro os empregados da concesionaria concentráronse nas inmediacións do ascensor Halo, onde o alcalde acudiu a presenciar unhas probas de iluminación, e tamén o increparon. Entón, o rexedor tamén se encarou con eles, facendo coa man o 'V' e lembrándolles que "só" eran "tres".