Detido un galego en relación co alixo de 1.100 quilos de cocaína interceptado en Vilanova
Detido un galego en relación co alixo de 1.100 quilos de cocaína interceptado en Vilanova
Con el son oito os arrestados nesta operación desenvolvida conxuntamente pola Policía Nacional e a Garda Civil
Prisión provisional para os sete albaneses detidos e o galego arrestado queda en liberdade con medidas cautelares
Ascende a oito o número de detidos na operación desenvolvida pola Garda Civil e a Policía Nacional que permitiu a desarticulación dunha organización criminal que se dedicaba ao transporte de 1.100 quilos de cocaína na comarca de Arousa.
A droga foi interceptada a bordo dunha embarcación cando a banda descargaba o alixo no municipio de Vilanova.
Aos sete arrestados nun primeiro momento de nacionalidade albanesa súmase agora un oitavo detido procedente da zona de Arousa.
Detidos na allada
A investigación iniciouse en novembro de 2024 cando os axentes detectaron a posible existencia dunha organización criminal, instalada no Salnés, dedicada ao tráfico de drogas.
Os axentes descubriron que a banda pretendía introducir unha importante partida de cocaína en Galicia. A finais do mes de decembro interceptaron no Atlántico unha embarcación de alta velocidade, dotada de tres motores de 450 cv de potencia cada un, en que viaxaban catro persoas a bordo.
Durante a pasada madrugada, un equipo do GEO da Policía Nacional realizou a abordaxe no momento xusto no que se atopaba alixando a cocaína en Rego do Alcalde, en Vilanova de Arousa.
Os axentes incautáronse de 1.100 quilos de cocaína e detiveron sete persoas que se dedicaban á carga e ao transporte da droga. Tamén aprehenderon unha pistola do calibre 9 mílimetros parabellum, dous vehículos, equipos de comunicación cos que se coordinaba o alixado e a embarcación de alta velocidade. Os sete detidos están sendo postos xa a disposición xudicial.
A operación continúa aberta
Esta operación, bautizada como operación Baroña, é o primeiro golpe que as forzas de seguridade desenvolven contra unha banda de orixe balcánica que tenta realizar unha descarga de droga directamente nas costas galegas.
A investigación, que continúa aberta, contou coa colaboración da DEA norteamericana, a Policía Xudiciaria de Portugal e a Aduana de Francia.
Instrúe dilixencias o Xulgado de Instrución número 3 de Vilagarcía de Arousa e a Fiscalía Especial Antidroga de Pontevedra.
Prisión provisional para os sete albaneses
Os detidos pasaron este xoves as disposición xudicial. O xuíz encargado do caso decretou prisión provisional, comunicada e sen fianza para os sete albaneses. O oitavo arrestado, o galego, quedou en liberdade pero con medidas cautelares. Ten a obriga de comparecer cada quince días no xulgado e a prohibición de saír do territorio nacional.
