A arte urbana cobra protagonismo nos espazos galegos

Co esbozo nunha man e o spray na outra Rubén dálle forma a un ferreiriño común. Os animais e a natureza son parte da temática preferida deste artista urbano. O mundo do graffiti está en auxe e canda el as empresas dedicadas a el. A empresa Trece Trazos naceu en plena pandemia e agora particulares, empresas e mesmo institucións públicas forman parte da súa carteira de clientes.

Rubén Paz fixo da afección profesión e agora non para de recibir encargos.

Rubén Paz, graffiteiro: "Era unha afección cos amigos e sen intención de que me deixasen un sitio para pintar, daquela pintaba escondido sen medios nin apoio. É unha moda que saltou agora e hai moitísima demandas deste tipo de encargos".

Nun restaurante de Lugo apostaron polo seu traballo. Buscaban algo diferente, orixinal e ao mesmo tempo propio e sentimental.

Carlos Arias, hostaleiro: "É unha imaxe da casa de meu pai e a outra a imaxe da casa onde naceu a miña muller".

Tampouco faltan encargos particulares e homenaxes.

"Isto está xusto diante da nosa casa. É o noso can, foi unha cousa do meu pai".

Cunha ou outra temática a arte urbana triunfa nas rúas.

"A min encántame. Oxalá estivese todo así, mellor que feo e gris".

"Debuxos tan traballados e complicados é unha forma de arte como calquera outra, non todo está dentro dun museo". 

Trazos de cor que dan forma a unha expresión artística en auxe.