Ayoub Ghadfa, sangue, suor e medalla

O boxeo está de doce. Dúas medallas aseguradas, e opción a outra. A segunda é de Ayoub Ghadfa, que pasou por enriba do armenio Davit Chaloyan, aínda que con algún que outro problema. Pero os xuíces foron claros. Cinco a cero para o español.

Sobre o cuadrilátero, as sensacións eran moi boas. O armenio tentaba golpes illados e reducir a distancia ao máximo, pero Ayoub conectaba máis e era vistoso. Pero nunha acción das que buscaba Davit Chaloyan, unha desafortunada cabezada fixo saltar as alarmas. Unha brecha importante regaba con sangue o pescozo do andaluz.

Pero o equipo médico e o recuncho español fixeron un bo traballo. Despois de varias paradas, a hemorraxia parou e o boxeo foi o protagonista. Rematou o combate con Ayoub en distancia, recepcionando os ataques do rival e aproveitando as contras. Cinco a cero nas cartolinas, e a pensar na semifinal.