BBVA axusta a súa oferta co pago de 0,29 euros e unha acción por cada 5,019 do Sabadell
BBVA axusta a súa oferta co pago de 0,29 euros e unha acción por cada 5,019 do Sabadell
A idea do BBVA segue sendo tomar o control da entidade catalá se os titulares de polo menos o 50 % do capital do Sabadell deciden vender
O BBVA actualizou a súa oferta aos accionistas do Banco Sabadell na opa sobre a entidade catalá e agora propón pagar 0,29 euros en efectivo e entregar unha acción nova por cada 5,019 do Sabadell, valorando os dividendos que pagan ambas as entidades en outubro.
Ata o momento a oferta do BBVA aos accionistas do Sabadell pasaba por ofrecer unicamente unha acción nova do banco comprador por cada 4,83 do Sabadell sempre que os seus titulares aceptasen a proposta de vender os títulos.
Aínda que o BBVA advertiu desde un primeiro momento de que esta proposta se podía axustar se o Sabadell ou o propio BBVA repartían dividendos.
Valorando que o Sabadell abonou este martes 0,08 euros por acción aos seus accionistas e o BBVA pagará o próximo 10 de outubro un dividendo a conta de 0,29 euros por acción, o maior da súa historia, o grupo presidido por Carlos Torres actualiza a súa oferta de compra.
Deste xeito pasa a ofrecer aos accionistas do Sabadell 0,29 euros en metálico e unha acción de nova emisión do BBVA por cada 5,019 accións do Sabadell polo simple axuste técnico da oferta tendo en conta os dividendos que pagan este mes as dúas entidades.
Non se trata en ningún caso dunha mellora ou unha corrección á baixa, senón do mero axuste para preservar a proporción orixinal da oferta que, cando reciba o visto e prace da CNMV, o BBVA pretender lanzar aos accionistas do Sabadell.
A idea do BBVA segue sendo tomar o control da entidade catalá se os titulares de polo menos o 50% do capital do Sabadell deciden vender, aínda que queda por coñecer a opinión da Comisión Nacional dos Mercados e a Competencia (CNMC) e as condicións que podería poñer para dar luz verde á compra.
