Bembibre, epicentro na arte dos bonsais cun centro de cultivo e talleres

En Galicia atópase todo un referente no cultivo dos bonsais de gran parte de España. Para desenvolver esta técnica orixinaria de Oriente hai que investir moitas doses de constancia e de paciencia. Bembibre é un dos epicentros desta arte que cada vez conta con máis afeccionados.

O bonsai naceu na China como un símbolo da eternidade, pero foron os xaponeses os que levaron as técnicas do cultivo e deseño ao máximo nivel de refinamento. 

O galego Alberto Baleato fixo da súa afección a súa profesión actual deixando atrás o traballo de enfermeiro para entregarse de cheo a esta paixón. Pero que teñen os bonsais que enganchan? 

Este bonsaísta galego rexenta un negocio especializado no cultivo destas árbores no centro de Bembibre, onde tamén imparte cursos teóricos e talleres prácticos. Fai todo o proceso de produción e ten unha tenda con todo o necesario para o coidado destas árbores. 

Hai moitos mitos estendidos como que o bonsai non necesita moita auga ou que é de interior pero a súa zona de confort é o exterior.

Alberto, habitual dos concursos nacionais e europeos e viaxeiro frecuente do Xapón, explica que o bonsai é 95 % de agricultura e 5 % de arte porque o prioritario é que sexa unha árbore sa.

A partir desa base, e cos coñecementos e técnicas axeitadas, pódense crear verdadeira marabillas.