Besteiro confirma aos familiares do Pitanxo que o Goberno asinou o contrato para baixar ao pecio

O delegado do Goberno en Galicia, José Ramón Gómez Besteiro, reuniuse este martes con familiares das vítimas do pesqueiro galego Villa de Pitanxo, onde informou que o Ministerio de Transportes formalizou con ACSM o contrato de baixada ao pecio, polo que un barco xa está "dispoñible" en Vigo para acometer a operación.

Así o sinalou Besteiro aos medios de comunicación tras o primeiro encontro coas familias desde que tomou posesión, que se produciu na sede da Subdelegación do Goberno de Pontevedra, xa que os familiares así o solicitaron para facilitar que máis persoas puidesen acudir.  

O representante do Executivo central explicou que este martes o Ministerio enviou finalmente o contrato á empresa adxudicataria, ACSM Shipping, que xa o asinou, polo que agora cabe informar á Audiencia Nacional (AN), que é quen investiga o caso xudicialmente.  

Besteiro púxose ao disposición das familias co obxectivo de "coordinar e fortalecer" o traslado de información. Precisamente, esta foi unha das reivindicacións que lle fixeron os familiares na reunión. Tamén lle solicitaron que o Ministerio envíe toda a documentación pedida pola Audiencia Nacional para acelerar os trámites e poder acometer a baixada ao barco canto antes.  

A portavoz das familias, María José de Pazo, trasladou o seu malestar ao entender que o Goberno tardou en enviar os informes que o xuíz lle pediu sobre o caso. Ao preguntarlle sobre cando prevé que por fin se poida partir cara a Terra Nova, ela augurou que aínda a operación se atrasará porque é agora a Audiencia a que ten que acordar coa empresa cando a levará a cabo.

Con todo, José Cubeiro, director xeral de ACSM Shipping, a empresa adxudicataria do contrato para baixar ao Pitanxo, subliñou que "está todo en orde" tras a firma do contrato. A pesar de que este luns el mesmo advertiu de que ou se asinaba pronto o documento ou a operación podería cancelarse, este martes en declaracións lanzou unha mensaxe de esperanza, subliñando que aínda non hai data, pero que o barco está en Vigo xa a "disposición" e que nos próximos días coñecerase cando poderá partir cara a augas canadenses.  

O Villa de Pitanxo naufragou a 450 quilómetros da costa de Terra Nova en febreiro de 2022, acabando coa vida de 21 dos 24 mariñeiros a bordo. A partir de aí, as familias dos falecidos iniciaron unha serie de accións para tratar de esclarecer os feitos, polo que sempre pediron que se baixase ao pecio para atopar probas do que puido ocorrer.