Bombeiros españois e a UME continúan na busca de superviventes en Turquía

Despois de realizaren traballos de rescate en Turquía e de viviren unha experiencia complicada, un grupo de cinco bombeiros de Huelva regresaba este sábado ao aeroporto de Málaga. En Turquía quedan varios compañeiros e tamén membros da UME que continúan a buscar superviventes.

Conseguían rescatar con vida unha menor en Turquía. Despois de vivir unha experiencia satisfactoria e complicada, un grupo de cinco bombeiros regresaba este sábado ao aeroporto de Málaga. Alí reuníanse coas súas familias. Pertencen ao Consorcio de Bombeiros de Huelva e ao Concello e con eles chegaron tamén catro cans que participaron nos traballos de busca de superviventes. 

"O que atopamos foron cidades devastadas, co colapso dos edificios", di Eugenio Mantero, membro do Consorcio Provincial de Bombeiros de Huelva.

"A experiencia alí, coma na maioría dos terremotos, é algo devastador, con todo destruído", engade Juan José García, bombeiro do Concello de Huelva.

Outros bombeiros españois permanecen en Turquía, así como un continxente da Unidade Militar de Emerxencias. 

As imaxes do rescate con vida dunha nai e os seus dous fillos pequenos por parte da UME deron este venres a volta ao mundo. O tenente Mora relataba así os traballos de rescate que duraban 26 horas.

"Escoitamos que había vida baixo terra, que golpeaban, respondían aos golpes. Comezamos os traballos, cortando lousas de formigón e todo o que atopabamos ao noso paso. Foi un traballo conxunto de toda a sección, moi satisfactorio dado que conseguimos sacar con vida un neno primeiro, despois a súa irmá e por último a súa nai. Despois de toda esta desgraza conseguimos sacar un pouco de luz", relata o tenente Mora, xefe da sección de rescate do segundo batallón de intervención en emerxencias.

E aínda que co paso das horas é máis complicado, din que continuarán traballando sen descanso no intento de atopar máis superviventes.