Bruxelas mantén no 1,7 % a previsión de crecemento para España en 2024

A Comisión Europea mantén intactas as súas estimacións de crecemento para a economía española, do 1,7 % este ano e do 2 % en 2025, grazas a un peche de 2023 mellor do esperado e ao comportamento do consumo e o investimento, que seguirán apoiando a expansión económica nun escenario de retardación.

Con este dato, a economía española seguirá sendo a que máis medre entre as grandes da zona euro, fronte ao aumento do 0,3 % de Alemaña, o 0,9 % de Francia e o 0,7 % de Italia que contempla Bruxelas para o exercicio actual, no que a eurozona prevé que se expanda de media un 0,8 %.

De feito mentres a CE mantén a previsión de crecemento para España, reduce as expectativas na zona Euro, onde prevía unha suba do 1,2 % en novembro pasado, que agora deixa nese 0,8 %, tras un inverno nos que países da moeda común rozaron a recesión.

O Executivo comunitario publicou este xoves a actualización de inverno das súas previsións económicas, que tamén calculan unha inflación media en España do 3,2 % este ano (dúas décimas menos que a estimación anterior) e do 2,1 % o próximo.

Bruxelas apunta, por tanto, a unha "moderación" da actividade en España, que pechou o pasado ano cun crecemento medio do 2,5 %, e a súa estimación para 2024 é ademais tres décimas inferior ao 2 % que calcula o Goberno no seu último escenario macroeconómico.

O departamento económico da Comisión explica esta retardación polo menor impulso do turismo e a "aínda débil situación dos principais socios comerciais" do país, dúas cuestións que "limitarán o dinamismo das exportacións".

Doutra banda, o Executivo comunitario cre que a política monetaria do Banco Central Europeo (BCE) que mantén o tipo de xuro de referencia no 4,5 % seguirá afectando a demanda doméstica "especialmente á luz dos aínda elevados, aínda que en descenso, niveis de débeda interior e exterior".

En contraposición, Bruxelas espera que o consumo privado, apoiado en melloras da renda dispoñible e no uso "parcial" do aforro, e un investimento amplificado polo plan de recuperación "sosteñan a expansión económica este ano" beneficiándose tamén dun final de 2023 que foi mellor do esperado, cun crecemento do PIB no último trimestre do 0,6 %.

Isto, sumado a un comportamento do emprego que se "desacelerará" pero que "aínda contribuirá á actividade económica e a unhas condicións de financiamento para as empresas que se suavizarán no medio prazo, farán que o crecemento do PIB "acelere de novo en 2025" ata alcanzar o 2 %.

"O consumo e o investimento (en España) conducirán o crecemento grazas a novas ganancias de poder adquisitivo dos fogares e a execución continuada do plan de recuperación", explicou nunha conferencia de prensa o comisario de Economía, Paolo Gentiloni.