Bruxelas propón ampliar a excepción ibérica, pero suavizando o tope ao gas

A Comisión Europea expón que o modelo da excepción ibérica que permite a España e Portugal poñer un teito ao prezo do gas utilizado para xerar electricidade se estenda ao resto da Unión Europea cun tope de entre 100 e 120 euros o MWh, un límite máis suave que a media de 60 euros do marco hispanoluso; un paso co que estima un beneficio neto de 13.000 millóns de euros para o bloque.

Bruxelas di que os beneficios netos resultantes terán un "efecto beneficioso sobre a inflación", aínda que advirte de que un dos riscos asociados á medida é o previsible aumento do consumo do gas, en contra do obxectivo de buscar fontes alternativas tras a ruptura con Rusia pola súa invasión de Ucraína.  

Neste contexto, os servizos comunitarios apostan por fixar un prezo máximo "o suficientemente alto para que a enerxía a gas non se volva máis atractiva" que producir electricidade a partir doutras tecnoloxías.

Á súa chegada á reunión de ministros de Enerxía da UE en Luxemburgo, a vicepresidenta terceira e responsable de Transición Ecolóxica, Teresa Ribera, dixo que España apoiará os países que defenden a extensión do mecanismo ibérico porque entende que sentan "desprotexidos" fronte á alza dos prezos.