Os tres primeiros, en tres segundos no Rally Rías Baixas
Os tres primeiros, en tres segundos no Rally Rías Baixas
Ruiloba encabeza a clasificación con Cachón no segundo posto e Cohete Suárez como terceiro clasificado
Jorge Cagiao e Javier Pardo, cuarto e quinto, son os mellores galegos
Diego Ruiloba, co seu Citroen C3, marcha en primeira posición do Rally Rías Baixas despois da disputa dos catro primeiros treitos puntuables. A igualdade é máxima con Alejandro Cachón na segunda praza a 2,9 segundos e José Antonio "Cohete" Suárez, líder do Supercampionato de España, na terceira posición a 3,0 segundos.
Os cuarto e o quinto son dous galegos; Jorge Cagiao e Javier Pardo. Malia estar a menos de trinta segundos parece moi difícil que poidan pelexar polo podio polo gran nivel que están amosando os tres pilotos asturianos.
Suárez comezou marcando o scratch nos dous primeiros treitos pero logo chegou o momento de Cachón e Ruiloba que foron os máis fortes no terceiro e cuarto treitos.
Para mañá queda o groso do Rally Rías Baixas coa disputa de seis treitos cronometrados. O de Salceda (TC+ e o que pechará o Rally) semella que pode decidir o gañador e verémolo en directo na G2 e Agalega.gal.
