Campaña masiva na fin de semana de vacinación pediátrica contra a gripe

A proba de hai unha semana en Santiago para vacinar menores de entre seis meses e cinco anos nos hospitais durante a fin de semana funcionou, así que este sábado e domingo esténdese ao resto de centros galegos. 

Ante o aumento das urxencias pediátricas hospitalarias e tamén nos centros de saúde por virus respiratorios, as autoridades sanitarias fan un chamamento á prevención. A administración masiva da vacina faise nos 14 hospitais de todas as áreas sanitarias.

Hospital Álvaro Cunqueiro

No Álvaro Cunqueiro de Vigo, as familias aproveitaron que non hai colexio nin traballo para achegarse ao hospital. Dende o mércores, foron recibindo un SMS citándoos para este sábado e domingo.

O Sergas pretende darlle un impulso a unha campaña, a da vacinación pediátrica da gripe, que comezou en outubro e que aínda non chega ao 40 % dos menores entre os seis meses e os cinco anos. 

A preocupación ante o incremento das afeccións respiratorias, catarros, gripes, e coronavirus, que sobrecargan as urxencias pediátricas, está levando a moitos pais e nais ata o seu hospital de referencia.

A consellería de Sanidade insiste en que vacinar menores contra a gripe reduce as posibilidades dunha hospitalización e frea os contaxios, xa que son unha gran correa de transmisión dos virus. Tamén do da gripe.