Canarias asumirá que os menores que cheguen en caiucos son competencia do Estado

O Goberno insular acaba de anunciar que a partir de agora asumirá que os menores que cheguen en caiucos están baixo custodia policial e son competencia do Estado.

Tras reunir o pacto migratorio, o presidente canario pediulle ás ONG que xestionan os seus centros de acollida que non acepten ningún menor máis sen o permiso expreso da comunidade.

Desbordado pola chegada de migrantes, o presidente canario está disposto a todo. O Consello de Goberno das illas debate abrir un proceso xurídico contra o Estado pola xestión da crise migratoria. Acusa o Goberno de abandono de funcións.

"Se non hai lealdade e compromiso, o Goberno de Canarias vaise poñer no seu sitio. O Goberno de España está abandonando Canarias", di Fernando Clavijo.

En xogo está, ademais, o apoio parlamentario de Coalición Canaria.

"Suponse que temos un acordo para darlle estabilidade ao Goberno de España sempre e cando se cumpran uns compromisos coas Canarias que non se están cumprindo", asegura Clavijo.

O Goberno vincula a solución da crise migratoria á reforma da Lei de estranxeiría, e culpa o Partido Popular de bloqueala.

Elma Saiz, ministra de Inclusión social e Migracións, di: "Precisamente o PP, que goberna con Coalición Canaria, é quen pechou a porta a ese escenario".

Borja Sémper, portavoz nacional do PP, responde: "Levan seis anos gobernando seis anos, seis anos. E seis anos despois estamos así... Só faltaría que lle botaran a culpa ao PP".

As críticas veñen tamén desde os socios de Goberno.

Elizabeth Duval, secretaria de Comunicación de Sumar, di: "O Partido Socialista debe rectificar. Copiar as receitas da dereita e da extrema dereita só beneficia a extrema dereita".

Sumar insta os socialistas a acelerar a tramitación da Iniciativa Lexislativa popular  que impulsa a regularización de máis de medio millón de migrantes que están en España de maneira irregular.