Celanova despide o Entroido co gran desfile adiado do sábado de Piñata
O Concello agarda unha edición de récord cunhas 1.400 persoas inscritas e 43 comparsas, charangas e por suposto disfraces
Por mor do temporal tiveron que suspender o acto central do seu entroido o pasado 8 de marzo
O desfile comezará o sábado a partir das 17:30 horas polas rúas da vila, despois haberá sesión de DJ e orquestra
Na vila de Celanova, xa está todo listo para despedir por fin o Entroido deste ano. Por mor do temporal tiveron que suspender o desfile do sábado de Piñata e agora, tres semanas despois, mañá sábado celebran o seu día grande.
Últimos ensaios dos bailes cos que as máis pequenas da comparsa os Arrítmicos de Celanova van sorprender no desfile do Sábado de Piñata.
E mentres elas non paran de bailar, os maiores fan probas de maquillaxe e danlle os últimos retoques ás súas carrozas. Todo está xa listo para despedir, agora si, o Entroido como merece.
Con tres semanas de atraso polo mal tempo, Celanova vai festexar o día grande do seu Entroido. O Concello agarda unha edición de récord cunhas 1.400 persoas inscritas e 43 comparsas no desfile de Piñata, que comezará a partir das cinco e media da tarde.
Un Entroido xa primaveral que comezaba o pasado 7 de febreiro co Petardazo e o Fareleiro en Xinzo de Limia e case dous meses despois, os máis entroideiros teñen aínda unha cita en Celanova.
