Os centros comerciais galegos esperan os días de máis traballo do ano

Os centros comerciais galegos estarán ao tope desde hoxe ata o vindeiro 23, o día de máis traballo do ano, segundo calculan no centro comercial Vialia de Vigo.

Papá Noel está reservando alí moita telefonía, moitos videoxogos e tecnoloxía en xeral e moita roupa e calzado. Calzado sobre todo deportivo, tamén botas, deportivas de vestir ou as famosas australianas ou californianas, que están a arrasar entre o público portugués.

Tamén perfumes, xoias ou libros poden atoparse neste centro comercial cuxa gran vantaxe, coma en todos, é contar con aparcadoiro propio e poder adquirir variedade de regalos baixo o mesmo teito. 

"Algo de roupa e algún xoguete para os meniños".

"Estamos intentando non toparnos a última hora coas multitudes ou que falte talle".

"Na miña familia facemos o amigo invisible e estamos comprando os últimos agasallos para facelo".

Semella que Papá Noel vainos vestir da cabeza aos pés, pero sobre todo os pés.

"Este ano nótase moitísimo a venda de botas e deportivas, sobre todo deportivas, é un agasallo que gusta a todo o mundo e cada fin de semana que pasa nótase moitísimo máis", explica Sara Muñiz, dependenta dunha tenda de calzado.

Tamén atopamos persoas que se centran no inmaterial e nas boas intencións.

"Eu saúde".

"Eu pido amor e saúde, e agasallar algo material si que toca".

Semella que non moitas cartas coma estas chegaron a Oriente ou á Laponia, porque son moitos os que se achegan aos centros comerciais a adquirir outro tipo de agasallos.