Chega a terra o barco cos tres superviventes e sete dos falecidos no naufraxio do "Villa de Pitanxo"

O barco que leva os tres superviventes do naufraxio do Villa de Pitanxo e os corpos dos sete pescadores recuperados do naufraxio arribou este sábado ás 07:10 hora local en Terra Nova, 11:40 en España, o porto de San Xoán no Canadá.

No pesqueiro Playa de Menduiña 2 viaxan os únicos tres superviventes do naufraxio do Villa de Pitanxo en augas de Terranova: son o patrón Juán Enrique Padín Costas, o seu sobriño Eduardo Rial Padín e o mariñeiro ghanés Samuel Kwesi Koufie.

Nas adegas do pesqueiro galego regresaron a porto sete dos corpos recuperados tras a traxedia no mar. Os outros dous cadáveres xa chegaron o venres no barco canadense Nexus.

Doce mariñeiros galegos permanecen desaparecidos polo naufraxio que se rexistrou a primeira hora do martes, cando o Villa de Pitanxo pescaba en augas do banco de Terra Nova, a uns 460 quilómetros ao leste de San Xoán.

O Playa de Menduíña 2 cos tres sobreviventes a bordo e sete dos cadáveres, tivo que demorar a súa chegada ao porto de San Xoán de Terra Nova 24 horas polas adversas condicións meteorolóxicas na zona, con refachos de vento afuracanados de ata 120 quilómetros por hora e chuvias intensas, ademais de escasa visibilidade.

Como sucedeu cos corpos dos dous pescadores transportados polo Nexus, prevese que os cadáveres dos sete tripulantes que arribaron a terra este sábado sexan trasladados ao Hospital Health Sciences Centre de Terra Nova para que os forenses da provincia procedan a identificalos.

Os tres sobreviventes da traxedia  recibirán atención médica para tratar os síntomas de hipotermia que sofren.

 Dos 24 tripulantes que ían a bordo do Villa de Pitanxo, 16 son españois, cinco peruanos, e tres ganeses. Os cónsul español en Montreal está en San Xoán de Terra Nova para seguir os traballos de identificación e facilitar a repatriación dos nove cadáveres e dos tres sobreviventes da traxedia.

O cónsul español en Montreal que se trasladou a Terra Nova puido falar cos tres mariñeiros que sobreviviron ao accidente "que están ben pero loxicamente moi afectados animicamente".

As autoridades españolas e canadenses proceden xa a identificación de todos os pescadores e tan pronto todos os datos sexan definitivos comunicaranllos aos seus familiares, o que agradan facer durante a tarde.

Tamén intentarán acelerar o proceso de repatriación. O avión español de Defensa chegará o domingo a estará listo para o regreso desde o luns mesmo, pero aínda non se pode garantir a xornada. Agardan iso si que sexa nos primeiros días da semana.

Presidencia organiza o protocolo da chegada dos mariñeiros, tanto dos superviventes como dos falecidos, para trasladarlles ás familias a data e coordinar así a súa presenza na chegada a Galicia.