Clamor dos veciños de Ponte Alvar ante as deficiencias en telecomunicación que sofren

En Santiago, os veciños da Ponte Alvar teñen a súa vida condicionada por un servizo telefónico de móbil deficiente ao que nos últimos tempos se engadiron problemas na fixa e na conexión á Internet.

Persoas maiores soas, estudantes e traballadores desde a casa son quen máis sofren uns prexuízos ante os que Telefónica, segundo contan, non responde.

Nin teléfono fixo, nin fibra para o servizo de datos, nin cobertura de telefonía móbil. Así resumen os veciños de Ponte Alvar, no concello de Santiago, o problema que teñen para a telecomunicación, e todo o que iso supón para a vida cotiá desde hai máis de dous meses.

A así segue hoxe en día para seis familias. Non teñen a conexión, con todo o que implica no desenvolvemento de estudo e de traballo dixital, e non só.

Aurora Otero, veciña que vive soa, di que a situación lle produce ansiedade polo temor a que lle pase algo de noite e non poida pedira axuda por non dispoñer de servizo de teléfono fixo.

Emilio Rial, veciño deste lugar compostelán, relata as protestas que teñen formula pedindo a reparación do servizo polos prexuízos que lles ocasiona e ás que ninguén atendeu ata o momento.

A fibra óptica permanece cortada desde que estiveron os últimos técnicos en Ponte Alvar e, como adoita pasar, as reclamacións a Telefónica sobre este servizo financiado con diñeiro público acumúlanse e os días pasan sen solución:

"Desde o día 9 de xaneiro que levo chamando case todos os días non nos chegan a dar ningunha resposta (desde o servizo de Movistar) e limítanse a dicir que o único que poden facer é reiterar as incidencias", di María Miramontes, outra prexudicada.

David Rial, outro veciño de Ponte Alvar, conta que cando lle mandaban unha mensaxe os técnicos de que ían ir a maior parte das veces non se presentou ninguén, mentres el perdía o tempo agardando nun lugar en que tampouco podía conectarse á interne no móbil por falta de cobertura.

Mentres tanto, a deficiencia no servizo de telecomunicación segue a alterar a rutina cotiá neste lugar preto de Santiago.