Coa chegada do frío increméntanse as vendas de roupa de abrigo

A chegada deste frío estase a notar tamén nas tendas de roupa que estes días experimentan un aumento considerable no interese por pezas de abrigo.

Gorros, bufandas, xerseis gordos ou cazadoras están tendo máis saída que de costume. Vese moita roupa de abrigo na rúa, pero tamén nas tendas.

Algúns comerciantes confirman "que ata tiveron que repoñer luvas". Outros contan que "a xente bótase aos xerseis gordos e aos abrigos". Unha situación favorable para os negocios que, con previsión de tempo fresco para toda a semana, agardan que se manteña uns días máis.