Como evitar os incendios nas vivendas durante o Nadal

No Nadal son frecuentes os incendios causados por problemas coas estufas, caldeiras de calefacción, chemineas e sobrecargas eléctricas, pero este ano o número de incendios é especialmente elevado.

"Tivemos un gran número de incidentes relacionados con incendios no fogar. Normalmente había algún, pero non tantos. Non é normal ter seis, sete, oito, nove incendios. A verdade é que nos sorprendeu!", di Marcos Araújo, xerente da Axencia Galega de Emerxencias.

Para evitar que esta cifra aumente, recomendan facer o mantemento de estufas e caldeiras, limpar os tiros das chemineas e os extractores e estar atentos á hora de cociñar.

"Estamos con xente na casa, poñemos unha tixola no lume, despistámonos, incéndiase a tixola con aceite e xa temos unha lea montada".

A iluminación do Nadal non ten moito perigo porque normalmente utilízanse luces led con consumos baixos, pero si hai que ter coidado coas instalacións eléctricas.

"Non sobrecargar os enchufes e cando vaiamos durmir ter todo apagado porque non imos estar pendentes se hai unha incidencia".

E tamén aconsellan instalar un detector de fume. Lembran que o seu custo é baixo e pode evitar sustos.