Condenado a máis de dez anos de prisión por disparar a outro home en Ferrol
A Audiencia da Coruña impútalle intento de asasinato e tenza ilícita de armas
O acusado deberá indemnizar a vítima con máis de 23.000 euros polas lesións e as secuelas
A sección segunda da Audiencia Provincial da Coruña condenou a dez anos e catro meses de prisión un home que disparou a outro no interior dunha vivenda de Ferrol.
O tribunal considérao autor dun delito de intento de asasinato e doutro de tenza ilícita de armas. A sentenza tamén lle impón o pagamento dunha indemnización de 23.310 euros á vítima polas lesións sufridas, a intervención cirúrxica, as secuelas e o prexuízo estético causado.
Segundo recolle a resolución xudicial, os feitos ocorreron durante a madrugada do 28 ao 29 de xuño de 2023, nun domicilio de Ferrol. Tras iniciarse unha discusión, o procesado abandonou a estancia e regresou pouco despois cunha pistola semiautomática coa que apuntou á cara da vítima e disparou a moi curta distancia.
O disparo impactou no ombreiro da vítima, causándolle feridas no úmero, no beizo superior e no pescozo. A Sala considera probado que o acusado tiña a intención de acabar coa vida da vítima, que se atopaba nunha situación de absoluta indefensión, sen posibilidade de reaccionar ante o ataque.
Os maxistrados sinalan que a utilización sorpresiva e inesperada da arma de fogo xustifica a aplicación da agravante de aleivosía, ao tratarse dun ataque repentino que impediu calquera defensa. Subliñan que a vítima non podía prever que o acusado regresaría armado.
A sentenza non é firme e contra ela cabe presentar recurso ante o Tribunal Superior de Xustiza de Galicia.
