Rebaixan de 20 a 4 anos de prisión a pena a un home por violar unha menor de 16 anos en Vigo

Un home admitiu que violou unha menor de 16 anos o verán de 2019 e aceptou este martes en Vigo unha condena de 4 anos e 3 meses de prisión, lonxe dos 20 que pedía inicialmente a Fiscalía.

O acusado, identificado coas iniciais A. J. A. L., recoñeceu a agresión sexual na vista oral do xuízo celebrada na sección quinta da Audiencia Provincial de Pontevedra, con sede en Vig, e confesou ser culpable dos tres delitos que lle imputaban sobre a mesma nova.

A Fiscalía pedía 20 anos de cárcere, pero rebaixou a pena de prisión ata 4 anos e 3 meses despois de aplicarlle as atenuantes de reparación parcial do dano (consignou 15.000 euros dos 20.000 da indemnización) e de dilacións indebidas por "certa paralización" na causa desde outubro do 2022 ata maio de 2024.

Respecto ao delito de agresión sexual sobre menor de 16 anos con acceso carnal, polo que se lle pedía 9 anos de prisión, a pena quedou en 2 anos; por outro continuado de agresión sexual rebaixóuselle de 5 anos de cárcere a 1, mentres que polo delito de agresión sexual concorrendo violencia e que se lle atribuía, pasou de 6 anos de reclusión a 1 ano e tres meses.

Dos 35 anos de inhabilitación especial para profesións, oficios ou actividades que impliquen trato con menores de idade que pedía a Fiscalía, foi finalmente condenado a 15 anos.

A Fiscalía tamén solicitaba ata 35 anos sen poder aproximarse á vítima ou comunicarse con ela, que quedaron en 11 anos, e ata 30 anos de liberdade vixiada a cumprir tras as respectivas penas privativas de liberdade, que se reduciu á metade.

O home deberá indemnizar, en concepto de responsabilidade civil, con 20.000 euros polos danos psíquicos e morais causados á vítima, 30.000 menos dos previstos inicialmente.