Condenan a un ano de prisión o home que lle deu unha labazada á muller en TikTok

O Xulgado do Penal de Soria condenou a un ano de prisión ao home que deu unha labazada á súa muller mentres esta realizaba unha emisión en directo a través da rede social TikTok.

Condénaselle como autor dun delito de malos tratos no ámbito da violencia contra a muller por agresión "ante miles de persoas".  

A sentenza tamén establece tres anos de prohibición de achegarse a menos de 300 metros da persoa, domicilio e lugar de traballo da vítima e de comunicar con ela por calquera medio ou procedemento, directo ou indirecto.  

Amais diso condénaselle a outros tres anos de privación do dereito de tenencia e porte de armas, segundo a sentenza facilitada este luns polo Tribunal Superior de Xustiza de Castela e León e recollida por Europa Press.  

A xuíza estimou, unha vez valorada a proba no seu conxunto, que "o acusado, dunha maneira pública e notoria, ante miles de persoas, agrediu a súa esposa, con intención de menoscabar a súa integridade física e de humillala en público".  

Así mesmo, engadiu que "sen que conste que lle causase lesións, producíronse uns malos tratos evidentes e reais, co cal se cumpren todos os requisitos previstos no art. 153.1 do Código penal e procede a condena do acusado como autor dun delito de malos tratos de obra no ámbito da violencia contra a muller".

Na sentenza, a maxistrada aclarou que "nos delitos de violencia de xénero non é necesaria a denuncia da vítima, debéndose castigar unha vez que se ten coñecemento da súa comisión". 

Neste sentido, apuntou que "basta co simple feito da retransmisión en directo da labazada para que os poderes públicos despreguen o ámbito de protección da vítima, con independencia de que ela se recoñeza como tal".  

A xuíz sinalou que "tampouco é xustificación da agresión, nin supón que non sexa castigada, o feito de que a vítima consinta e xustifique a labazada".  

"Nos delitos de violencia contra a muller, como en todos os delitos de lesións graves, o consentimento da persoa agredida é irrelevante e procede o castigo en todos os casos", advirte a maxistrada.  

Na gradación da pena, a xuíz tivo en consideración que o home "golpeou á vítima en público, ante miles de persoas, coa finalidade, ademais de causarlle uns malos tratos físicos, de humillala e menosprezala ante os seus amigos e coñecidos; impuxo a súa dominación sobre a súa esposa ante as redes sociais, sen que o feito de que estivese en directo lle fixese deter a súa agresión; e sentiuse ofendido polo que lle dicían á súa esposa e reaccionou agredíndoa en público".

"Esta conduta merece o maior reproche penal que permite a lei, merece que se impoña a pena no seu grao máximo, xa que o acusado non é capaz de respectar a súa esposa, nin sequera en público", recolle o fallo.  

Ademais, "esta conduta xa foi repetida en ocasións anteriores, xa que a vítima recoñece que, con anterioridade a estes feitos, recibiu dúas malleiras".