Mil galegos participarán nun estudo para detectar se son portadores de enfermidades hereditarias

Coa constitución dos comités científicos, interno e externo, bota a andar hoxe o proxecto Xenoma Galicia. Persegue, en cinco anos, crear aquí un banco xenómico que só ten precedente snas 500.000 mostras do biobanco do Reino Unido.

"O obxectivo é facernos cos datos xenómicos de 400.000 galegos. É un proxecto a medio prazo, non se fai en pouco tempo. Está dotado con 20 millóns de euros nos orzamentos deste ano e o compromiso é botalo a andar. E hoxe é un día importante para ese lanzamento", lembrou Xulio García Comesaña, o conselleiro de Sanidade. 

Hoxe falouse das garantías éticas e organizativas. E dos primeiros pasos, cun primeiro cribado con mil mostras de varias enfermidades accionables, en concreto cancro de mama e ovario hereditario, síndrome de Lynch e hipercolesterolemia familiar.

Os 1.000 primeiros recibirán a invitación antes de xullo para tomarlles a mostra de saliva ou de sangue. Despois informaranos do resultado. Se son portadores dunha destas doenzas contarán con asesoramento médico e tratamento. 

Neste proxecto da Consellería de Sanidade, participan todas as áreas sanitarias. O doutor Carracedo, director da Fundación Pública Galega de Medicina Xenómica, destacou tamén o apoio dos grupos parlamentarios ao que cualificou coma un proxecto de país.

 "Vai propiciar que poidamos predicir o risco das enfermidades, vai favorecer que se poida facer medicina personalizada. É un proxecto de país e que temos que contar coa xenerosidade dos galegos que aínda que teñan un beneficio directo pensen que esta é unha contribución para a ciencia e a saúde no mundo. Estou moi ilusionado porque me parece un dos grandes proxectos a nivel mundial", declarou Ángel Carracedo, o director da Fundación Pública Galega de Medicina Xenómica.