Un afamado cazameteoritos exhibe os seus tesouros na feira dos minerais de Vigo

A feira exposición de minerais regresou a Vigo esta fin de semana despois de catro anos sen se celebrar, desde a pandemia. Entre todos os postos destacou, pola expectación que suscitou, un afamado cazameteoritos

Os fragmentos de corpos celestes que trouxo a esta feira de minerais José Vicente Casado están datados e catalogados pola Universidade Politécnica de Cataluña. Un dos que exhibe en Vigo ten 4.500 millóns de anos de antigüidade.

"Como o do carbono 14, pero con outros medios que nos permiten coñecer idades moi superiores. E esa idade é na que o sol comezou a lucir, os planetas acabaron de conformarse... o interese real dos meteoritos é  que nos contan cousas interesantes: como se formou o noso sistema solar, cono se formaron outros planetas, se é posible que caia algún meteorito ou non, incluso, o máis interesante como puido chegar a vida á Terra, e se hai vida por aí, dando voltas polo espazo exterior. E ter nas túas mans unha rocha desa parte tan afastada, e moi emocionante", explica a TVG José Vicente Casado, cazameteoritos profesional. 

O seu é un dos catorce postos da feira e, sen dúbida, no que máis pararon os asistentes. Porque os meteoritos, difíciles de atopar e recoñecer e sen gran valor económico, son un xeito de tocar, dalgunha maneira, o espazo exterior.

Ademais dos meteoritos, na mostra exhibiron e venderon xoiería artesanal, pedras preciosas como diamantes, fósiles... Todo a gusto dos coleccionistas e dos cazadores de coñecemento dos minerais.