Continúa a busca de Óscar García, desaparecido en Teo o mércores
Deixou na casa as chaves, a carteira, o teléfono e as lentes
A familia cre que non marchou por vontade propia e pide a colaboración cidadá para atopalo
Terceiro día sen noticias de Óscar García Lema. Na contorna da súa casa de Cepeda, en Teo, grupos de voluntarios coordinados pola Garda Civil do Milladoiro exploran os montes e os camiños na procura dalgunha pista. Óscar, de 62 anos e complexión forte, desapareceu no mediodía do mércores.
"Estaba listo para saír da casa. Quedaramos para comer con el en Santiago e non chegou. Algo se truncou en cuestión de media hora. Despois xa me chamaron que non o daban atopado pola finca", explica a súa muller, Nuria Pereira Martínez.
A familia cre que Óscar non marchou por vontade propia. Deixou na casa as chaves, a carteira coa documentación, o teléfono móbil e as lentes.
"Non se foi por vontade propia, iso está clarísimo. Algo lle pasou, desorientouse ao mellor, pero é un home san e deportista, toda a vida fixo deporte", comenta Nuria.
Piden a colaboración cidadá para dar con Óscar. A busca polo perímetro máis próximo á casa, preto da urbanización Os Verxeis, non deu resultados polo momento. Por iso queren ampliar o radio e darlle máxima difusión á súa imaxe.
"Se pasean aquí ou noutra zona como Ames ou A Lavacolla, que por favor miren ben. E se teñen cans e eles notan algo, que nos chamen", pide a muller do desaparecido.
Esta tarde unha nova batida de voluntarios e cans seguirá peiteando a zona. Óscar, docente do Instituto Europeo Campus Stellae, mide 1,82, pesa 85 quilos e vestía de escuro cando desapareceu.
