Dani Alves di que non fuxirá se o deixan en liberdade e as acusacións piden que siga no cárcere
Dani Alves di que non fuxirá se o deixan en liberdade e as acusacións piden que siga no cárcere
Segundo fontes xudiciais, a resolución do tribunal debería producirse esta mesma semana
Na Audiencia de Barcelona celebrouse a vista para decidir sobre a petición de liberdade provisoria presentada pola defensa do futbolista Dani Alves que xa cumpriu a cuarta parte dos catro anos e medio de prisión aos que foi condenado por violación.
A Fiscalía e a acusación particular opóñense a que sexa posto en liberdade ata que a sentenza sexa firme e din que existe risco de fuga.
Con vinte minutos de atraso comezou na Audiencia de Barcelona a vista sobre a petición de liberdade presentada pola defensa do futbolista Dani Alves, condenado a catro anos e medio de prisión por violar unha moza nunha discoteca.
Durante a vista, que Alves seguiu por videoconferencia desde o cárcere de Brians, onde ingresou en xaneiro do ano pasado, a súa defensa alegou que xa cumpriu a cuarta parte da condena, o que, se a sentenza fose firme, lle permitiría acceder aos permisos penitenciarios.
"Medidas cautelares que solicitei, a retirada de pasaportes, comparecencias que se poidan presentar e unha fianza tamén".
A Fiscalía e a acusación particular opuxéronse a que o futbolista saia de prisión, xa que consideran que podería fuxir do país.
"Entendo que hai un risco de fuga, que debe manterse a prisión preventiva mentres se resolven todos os recursos presentados polas partes e a esperar a resolución da sala".
Na última quenda de palabra, Dani Alves dixo que confía na Xustiza e que non fuxirá se o deixan en liberdade. Segundo fontes xudiciais, a resolución do tribunal debería producirse esta mesma semana.
