Dar en solitario a volta ao mundo con vela desafiando o trastorno do espectro autista

Recíbeno por mar membros do Club Marítimo de Oza, na Coruña, onde permanecerá os próximos días. Xa en terra, danlle a benvida integrantes da Asociación Galega de Asperger. Johannes Li, alemán de 19 anos, está a realizar unha travesía con vela en solitario. Iniciouna en xuño do ano pasado en Holanda e ten previsto percorrer o Mediterráneo.

"Na miña vida, hai anos, como tiña o problema do autismo e ao principio as persoas coma min estabamos limitadas polos estereotipos, iso deume a idea de poder modificar esa forma de pensar da xente. E como me ecanta ir ao mar, decidín que a forma de mudar iso era facer esta viaxe", explica Johannes Li, alemán de 19 anos con autismo que quere dar a volta ao mundo navegando en veleiro.

A Asociación Galega de Asperger loa a fazaña de Johannes pola visibilidade que lle dá ao trastorno de espectro autista en que a asociación traballa desde 2006.

"Son capaces, poden derrubar barreiras, poden, se queren, manter os seus soños e facelos realidade. Para nós é un orgullo que esta persoa tomara esta decisión por ela mesma de dar a volta ao mundo", expón a directora de ASPERGA Marisol García.

No veleiro en que navega actualmente aprendeu a navegar Johannes aos 11 anos, un ano despois de que lle diagnosticasen espectro autista. É un barco que data de 1965 e que el mesmo restaurou. Demasiada idade quizá para dar a volta ao mundo, pero iso non impide que Johannes persista no seu soño. De feito, para lograr o seu obxectivo está á procura de quen apoie o seu proxecto para poder facerse cun barco que lle permita cruzar o Atlántico.