Sánchez deixa en mans de Óscar Puente a réplica: "Goberna quen ten a maioría"

O PSOE botou man do exalcalde de Valladolid Óscar Puente para reprochar ao líder do PP e candidato á investidura, Alberto Núñez Feijóo, que utilice o argumento da lista máis votada para aspirar a gobernar, cando o agora deputado socialista perdeu a alcaldía por unha "coalición" de PP e Vox.

A elección de Puente para responder a Feijóo en nome do grupo parlamentario socialista, en lugar de Pedro Sánchez ou de Patxi López, foi "unha forma de poñer fronte ao espello todas as contradicións do líder do PP", segundo explican fontes do PSOE.

"Feijóo nin vostede nin eu gañamos as eleccións. A min non me custou recoñecelo, recoñecín a miña derrota a pesar de ser o máis votado (nas eleccións municipais de maio de 2023). Nunha democracia parlamentaria encabezar a lista máis votada non é gañar as eleccións, gaña quen logra formar goberno", sinalou Puente.

O exalcalde de Valladolid, que se estrea nesta lexislatura como deputado, comentou que a el lle sucedeu igual que a Feijóo porque foi o candidato máis votado, pero "unha coalición formada" polo PP e "a ultradereita" de Vox relegouno "á oposición".

"Iso que viñeron chamar unha coalición de perdedores, expresión acuñada en 2015 e que en 2019 empezaron a abandonar, tan pronto como as coalicións de perdedores empezaron a protagonizalas vostedes", engadiu.

Entre outros casos, mencionou gobernos encabezados por dirixentes do PP que non gañaron as eleccións, como Isabel Díaz Ayuso (Comunidade de Madrid) tras os comicios de 2015, Juanma Moreno Bonilla (Andalucía) tras os de 2018 e Alfonso Fernández Mañueco (Castela e León) e José Luis Martínez-Almeida (Concello de Madrid) tras os de 2019.

"Agora explíqueme, señor Feijóo, de gañador a gañador. Xa que estamos en igualdade de condicións, por que ten mellor dereito a ser presidente de Goberno que eu alcalde de Valladolid?, preguntou.

Puente acusou a Feijóo de tentar provocar unha rebelión no PSOE, un novo tamayazo, para a continuación facer unha advertencia ao líder do PP e a toda a "dereita, a política e a mediática".

"Perdan toda esperanza de crebar este PSOE que tanto lles molesta". Pode, dixo, que non sexa o mesmo PSOE de hai 30 anos, ao que os populares lles facían "o mesmo", aínda que "algúns dos que dirixían entón parezan esquecelo", porque, entre outras razóns, para ser un partido centenario hai que evolucionar. 

Berros de "covarde" a Sánchez

O candidato do PP, Alberto Núñez Feijóo, reprochou que o presidente en funcións, Pedro Sánchez, que lle pediu en campaña ata seis debates, non lle replicara no debate de investidura, e acto seguido desde a bancada do PP escoitáronse berros de "covarde" ao líder do PSOE.

"Señor Sánchez, pedíame seis debates durante a campaña electoral e agora, non é capaz de facer o segundo?", ironizou Feijóo ao replicar brevemente ao deputado do PSOE, Óscar Puente, cuxa intervención tachou de "club da comedia".

"Covarde, covarde", berraron acto seguido algúns dos deputados populares, aos que a presidenta o Congreso, Francina Armengol, volveu a chamar á orde.

"En democracia respéctanse as institucións. Pídolles silencio e respecto a todas as institucións e tamén ao Goberno de España. Respecten esta Cámara e a soberanía nacional e o dereito dos cidadáns. E o señor Feijóo ten a palabra", recalcou Armengol.

Feijóo acusou a Puente de insidialo e calumnialo cunha intervención "lamentable" en que o deputado do PSOE trouxo a colación a amizade do líder do PP co narco Marcial Dourado nos anos 90, e asegurou que os cidadáns de Valladolid "non merecen este nivel".

Ademais, acusou a Pedro Sánchez de "anomalía democrática": "É vostede o primeiro presidente perdedor dunhas eleccións que aspira a volver ser presidente e é o primeiro presidente en funcións que non fai o debate do candidato alternativo", exclamou. O presidente en funcións asentiu e encolleuse de ombreiros.

Feijóo afeou despois as risas de Sánchez cando lle dixo que pensaba que pola súa "soberbia" non debatería con quen lle gañou as eleccións e lle gañou en escanos, pois o socialista "xamais" sacou 137, como nesta lexislatura o PP.

O candidato popular tamén deixou reproches contra Patxi López, de quen dixo que non era adecuado para a tribuna porque o "único cargo que tivo na súa vida" o obtivo porque o PP "o votou despois de perder as eleccións"; a Lehendakaritza en 2009.

E ironizou ao advertilo de que teña coidado vendo o destino doutros secretarios xerais do PSOE vasco, en alusión á expulsión do partido de Nicolás Redondo.

Abascal reafirma o seu apoio a Feijóo, pero con repoches

O líder de Vox, Santiago Abascal, reafirmou o apoio dos seus deputados á investidura do candidato do PP, Alberto Núñez Feijóo, aínda que lle reprochou que non apoiara as súas mocións de censura contra Pedro Sánchez recriminando ao presidente dos populares os argumentos que utilizaron para absterse.

"Eu podería dicirlles hoxe, a modo de reproche, aquilo de que hai que saber sumar, de que non dan os números para esta investidura ou que é unha investidura ociosa, mesmo que é un balón de osíxeno para o PSOE ou simple propaganda, pero non o vou dicir porque ademais non o creo", apostilou Abascal.

De feito, o líder de Vox considera que esta sesión de investidura, que previsiblemente acabará sendo errada, se trata dunha "boa ocasión para retratar o peor Goberno da historia de España".

Abascal pediu ao líder do PP traballar xuntos para construír unha alianza nacional "sen melindres e sen complexos" para tratar de deter cada paso que o "separatismo golpista" pretenda dar a través do seu "cómplice na Moncloa".

Pola súa parte, o candidato do PP á Presidencia do Goberno mostrou a súa boa relación con Vox, agradecendo o seu apoio á investidura, pero lanzou un aviso a Santiago Abascal ao sinalar que a división do centrodereita beneficia o PSOE de Pedro Sánchez.

"Eu non sei se Vox vai desaparecer ou non, non llo podo asegurar. O que si lle aseguro é que entre o PP e Vox sacamos 600.000 votos mais que PSOE e Sumar. Se o centrodereita non se fraccionou hoxe teriamos máis de 190 escanos", dixo Feijóo, aludindo á lei D'Hont.

Feijóo agradeceu a Vox o seu voto favorable e sen contrapartidas, aceptando non entrar nun Goberno e, aínda cando entrambos hai "diferenzas notorias", ve acreditado" que Vox entende que "España está nunha situación comprometida" e eloxiou o seu "nivel de patriotismo" e "puntos de encontro".

Aínda que tamén advertiu de que con Vox "non lle foi mal ao PSOE" e que "Sánchez puxo eleccións o 23 de xullo por algo", en alusión aos acordos autonómicos con esta formación.

Sumar di que a amnistía  vai dirixida a "centos de persoas anónimas"

A portavoz no Congreso de Sumar, Marta Lois, reivindicou a amnistía como "unha oportunidade para pasar páxina" en Cataluña, defendendo que esta lei non vai dirixida "ás elites políticas", senón para "centos de persoas anónimas" que, segundo dixo, "se viron envoltas nun conflito político".

Así o dixo Marta Lois no debate de investidura do candidato do PP, Alberto Núñez Feijóo, dirixíndose explicitamente ás persoas que "teñen dúbidas" sobre unha posible lei de amnistía, tal e como piden os partidos independentistas para apoiar un hipotético Goberno de coalición.

Neste contexto, Lois saíu en defensa dunha amnistía sostendo que se trata  "dun paso máis" en Cataluña despois dos indultos aos dirixentes encarcerados do procés.

Á súa vez, preguntou a Feijóo "cal é o seu medo" a esta posible lei de amnistía."Parece que é unha desgraza de quen quere seguir vivindo do conflito e sacar rédito del", apostilou a portavoz de Sumar.

Pola súa parte, o deputado de Sumar da cota de IU, Enrique Santiago, tachou ao PP de "anomalía democrática" e sinalou que aínda que para os populares España sempre se está a romper, "a verdade é que España só está en risco de romper" cando gobernan os populares.

Santiago, cun ton bastante bronco, reprochou a Alberto Núñez Feijóo, o candidato á investidura, o seu rexeitamento frontal á amnistía cando, segundo dixo, José María Aznar indultó a 15 terroristas de Terra Lliure, Mariano Rajoy ofreceu unha amnistía aos condenados do procés "para baixar a temperatura" en Cataluña e mesmo Aznar aprobou un indulto xeral que afectou a 1.440 persoas.

Na quenda de Lois, que foi a primeira portavoz en utilizar unha das linguas cooficiais (o galego), aínda que só foron unas poucas frases, fixo virar o seu discurso ao redor da foto dos pactos da Moncloa que acompaña o documento que o PP trasladou a todos os grupos parlamentarios coa oferta de seis pactos de Estado, gobernar dous anos e convocar eleccións.

Mostrou a foto en branco e negro para recalcar que nesa instantánea hai nacionalistas, comunistas, etcétera: "As forzas coas que vostede non pode falar e por iso non teñen un só voto máis", díxolle a Feijóo.

Cando lle tocou a Feijóo responderlle, contraatacou con outra foto, a dunha deputada de En Marea cunha camiseta co lema "Chavez xúrocho, votaremos a Maduro".

A outra representante de Sumar que se subiu á tribuna durante a réplica foi a portavoz dos comúns, Aina Vidal, que criticou a Feijóo por vir ao hemiciclo para "facer ilusionismo" ao facer crer que gañou as eleccións porque aínda que "quedou primeiro en votos, gaña quen pode formar goberno".

Feijóo ao responder a todos os que interviñeron en nome da coalición de esquerdas asegurou que o papel de Unidas Podemos no Goberno foi o do “ridículo en ridículo en política nacional e internacional”, mencionando, entre outras cousas, a división sobre a OTAN, a axuda militar a Ucraína ou o investimento en Defensa.

E da líder de Sumar lembrou cando dixo "que había que botar a Feijóo a votos ou a pedradas e que o presidente da Xunta mataba a máis xente que calquera terrorista".

Igual que a deputada dos comúns, Feijóo fixo tamén un prognóstico para Sumar: "Seguirán celebrando a súa derrota e repartíndose os cargos ata a derrota final”.