Decepción en Betanzos pola cancelación do lanzamento do globo de san Roque
Decepción en Betanzos pola cancelación do lanzamento do globo de san Roque
Os veciños concentraranse o próximo xoves en sinal de protesta
A Fundación Globo de San Roque aduciu falta de tempo para construír o aeróstato
O venres confirmáronse os rumores que circulaban dende había días por Betanzos: cancelábase o lanzamento do globo de papel, o momento máis agardado das festas de san Roque. A noticia provocou decepción e indignación a partes iguais entre os veciños, que preparan unha concentración de protesta para a tarde do próximo xoves, coincidindo coa celebración do pleno municipal.
A Fundación Globo de San Roque confirmou que non haberá aeróstato a través dun comunicado no que aduce falta de tempo para a súa construción. A fabricación artesá do globo esixe meses de traballo e a un mes das festas o proceso nin sequera comezou.
Unhas cincuenta mil persoas asisten cada ano ao lanzamento. A familia continuou durante case século e medio a tradición iniciada por Claudino Pita en 1875. O globo só faltou á cita en ocasións puntuais e moi xustificadas, como a Guerra Civil ou a pandemia.
O Concello de Betanzos preside a fundación encargada de conservalo e protexelo. A entidade comprometeuse a que o aeróstato si estea nas festas de san Roque do próximo ano.
