A acusada de matar a compañeira de piso en Valdeorras di que moitos clientes tiñan chave da casa

En Ourense declarou este xoves a muller acusada de matar a súa compañeira de piso no Barco de Valdeorras.

As acusacións están convencidas de que o fixo por cartos…, pero ela nega con rotundidade ser a autora do crime.

"Cando prendín a luz, a miña amiga estaba no chan. Para min era como unha irmá", declarou a acusada.

Entre saloucos, Fátima negou ser a responsable da morte de Leticia. Tan só contestou as preguntas do seu avogado.

Segundo dixo, cando chegaron ao piso que compartían despois do traballo, cearon e cada unha foi para o seu cuarto. Ela, afirmou, puxo uns auriculares, e non volveu saber nada da vítima ata que chamou á súa porta contra as dúas da tarde e a atopou morta.

Subliñou que recibían clientes no piso e que algúns deles mesmo tiñan chave.

Negou ter problemas económicos ou débedas con Leticia, mesmo dixo que lle deixara diñeiro, segundo ela pola presión que sentía a vítima para enviar cartos á súa familia en Paraguai.

"En moitas ocasións eu deixeille diñeiro a Leticia. Ganaba máis ca min, pero...".

Recoñeceu ter carácter, pero non para facer dano.

Antes dela declarou  o forense, que confirmou que Leticia morreu asfixiada cun obxecto brando entre as 4 a 6 da mañá. Tamén declararon varios peritos policiais, entre eles o que analizou os móbiles.

Os teléfonos da vítima, que nunca chegaron a aparecer,  movéronse do seu cuarto á cociña pola mañá cando xa estaba morta, pero non saíron do piso.

O xuízo retomarase este venres coas conclusións das distintas partes. A acusada enfróntase a penas de entre 12 e 20 anos de cadea.