Deixan en liberdade o investigado polo accidente mortal de Cangas
Deixan en liberdade o investigado polo accidente mortal de Cangas
A Audiencia Provincial atende o seu recurso e entende que a prisión provisional era unha medida excesiva
O home xa depositou unha fianza de 15.000 euros e non poderá residir na localidade do Morrazo
O condutor fora detido tras supostamente causar un accidente mentres fuxía da policía e que lle custou a vida a outro home
O home detido o 26 de xullo en Cangas, tras bater co seu coche outro condutor e causarlle a morte, foi posto en liberdade, tras varias semanas en prisión provisional, despois de que a Audiencia Provincial acollese o seu recurso, aínda que non poderá residir nesta localidade do Morrazo mentres dure a instrución.
O Xulgado de Instrución número 2 de Cangas acordara o seu ingreso en prisión provisional, investigado por homicidio doloso, condución temeraria con desprezo pola vida dos demais, desobediencia, resistencia á autoridade, lesións e condución baixo a influencia de bebidas alcohólicas.
Tras a presentación de recurso, a Audiencia entendeu que a prisión provisional era unha medida excesiva para garantir a súa comparecencia en xuízo, polo que acordou a súa posta en liberdade, previo pago dunha fianza de 15.000 euros, que foi depositada este luns.
Con todo, o xulgado acordou unha serie de medidas con respecto ao investigado. Así, deberá comparecer quincenalmente, prohíbeselle saír do territorio nacional e debe entregar o pasaporte, retiróuselle o permiso de conducir e ten prohibido residir no termo municipal onde ocorreron os feitos.
O accidente mortal ocorreu á primeira hora da mañá do 26 de xullo, cando o coche conducido polo investigado, un Porsche Cayenee, bateu contra o vehículo da vítima (un mariñeiro que regresaba de traballar), á altura do mercado de abastos de Cangas.
O investigado fora detectado pola Policía Local conducindo de maneira errática e, ao decatarse da presenza dos axentes, iniciou a fuxida. Durante a persecución o condutor aumentou a velocidade e perdeu o control do coche, impactando contra o coche da vítima. O investigado, que ía acompañado doutra persoa, deu positivo nas probas de alcol e drogas.
