Demócratas e republicanos acordan aumentar a débeda dos EUA

Congresistas e senadores nos Estados Unidos estudan a partir de hoxe o proxecto de lei para elevar o teito de débeda acordado entre a Casa Branca e os republicanos, unha norma que non convence a todos e que será votada o vindeiro mércores.

O presidente estadounidense Joe Biden confirmou que chegou a un acordo definitivo para elevar o teito de débeda co líder republicano na Cámara de Representantes Kevin McCarthy e que o texto está listo para ser votado no Congreso. 

Cada certo tempo, os Estados Unidos achéganse á falla de pagamento da débeda nacional porque, á diferenza doutros países, o Goberno só pode emitir débeda ata o límite establecido polo Congreso, que ten o poder de elevar ese teito segundo crea conveniente.

O país alcanzou o pasado 19 de xaneiro o seu límite de débeda legal de 31,4 billóns de dólares, o cal levou ao Departamento do Tesouro a recorrer desde entón a medidas extraordinarias para pagar as contas.

Institucións como a Reserva Federal alertaron estes meses dos riscos de non elevar o teito de débeda.