Denuncia que un albergue provoca graves filtracións de auga á súa vivenda de Santiago

As filtracións de auga que sofre esta veciña dos Concheiros, en Santiago, na súa vivenda, veñen de tempo atrás, pero nos últimos tempos foron a máis e denuncia que se sente impotente ante a falta de solucións.

Segundo ditamina un informe pericial encargado pola comunidade de veciños, a orixe das humidades é a mala execución dunha obra no inmoble superior, habilitado desde hai uns anos como albergue de peregrinos.

Ademais, a filtración de auga xa afectou a instalación eléctrica, e a iluminación desta parte da vivenda está inutilizada. 

O problema quedou atenuado durante o confinamento, ao permanecer pechado o establecemento e quedar sen usar os baños. Pero agora empeorou, segundo testemuñas dos veciños do edificio, que trataron o tema na xuntanza da comunidade.

Os responsables do albergue alegan, en resposta á Televisión de Galicia, que teñen todas as licenzas en orde e que ata hoxe mesmo non recibiran o informe pericial que determina que son responsables das humidades e de facer as reparacións oportunas das que, aseguran, se farán cargo de inmediato.