Desafío solidario na ría de Muros para visibilizar a ELA

24 horas pedaleando para darlles visibilidade aos enfermos da ELA. Un desafío solidario que comezou este mediodía en Muros para recadar fondos que melloren a calidade de vida das persoas que a padecen e tamén a das familias coidadoras.

300 persoas viven en Galicia coa ELA, unha enfermidade neurodexenerativa cunha esperanza de vida de entre 3 e 5 anos. Os pacientes de Esclerose Lateral Amiotrófica precisan duns coidados que non todos poden asumir, por iso reclaman que saia adiante xa a lei que lles permita unha vida digna, tal e como reclama Pilar Guimeráns, vogal de AGAELA.

Eles queren vivir, a ELA non é morte. É moi duro cando vas e che dan un diagnóstico de 3 a 5 anos e que fagas un testamento vital. 
É unha enfermidade de ricos. Se tes cartos poderás ter unha cama adaptada, unha cadeira, accesorios, coidados... Un coidador 24 horas é unha loucura, así son as familias as que se encargan de ser os coidadores principais, con toda a carga que supón. Axuda psicolóxica tamén precisamos. Desde a sociedade temos que tratar de que os enfermos de ELA teñan calidade de vida desde o minuto un.

Hoxe esa reclamación está en cada pedalada que dá Roberto e o seu equipo ciclista de Bermeo aos que trouxo ata a ría de Muros para darlle continuidade á iniciativa solidaria Dalecandela. Roberto non durmirá esta noite, porque desde as 11 da mañá deste sábado ata a mesma hora do domingo non baixará da bicicleta facendo un circuíto entre Noia, Muros e o Ézaro. Un esforzo que para Roberto García, promotor do desafío "24 horas pedaleando pola ELA" non é tal comparado co que sofren os enfermos.

Pensando no obxectivo que é a ELA isto non é nada duro, é o máis fácil, o máis fácil é andar na bicicleta. Pensando na enfermidade superas todo iso.

Por iso, o obxectivo é recadar fondos para a Asociación Galega, tanto no posto solidario que hai no Curro da praza, en Muros como a través da web www://migranodearena.org.