Desaloxan outro edificio no centro de Ourense por un incendio no ático

O lume que prendeu nun ático dun grande edificio da avenida da Habana obrigou a desaloxar as vivendas e a cortar o tráfico da vía para os labores de extinción de dos bombeiros e outros efectivos de emerxencias. Segundo as primeiras informacións, no ático había oito persoas e tres delas tiveron que ser atendidas polos equipos sanitarios por inhalación de fume.

"Desaloxaron todo; chamaron a todos os pisos e botaron a toda a xente fora", conta o veciño que vive no ático contiguo ao do incendio. El saíu dos primeiros alertado polo fume que lle chegaba a súa casa. 

"Vin que entraba fume pola canalización eléctrica. Puxen unha toalla mollada na boca e saín"

Todo parece indicar que o lume se orixinou nun aparato eléctrico. A gran columna de fume púidose ver desde moitos puntos da cidade. Ao ser un edificio céntrico, a despregadura de emerxencias espertou unha grande expectación.