Normalizada a situación no Hospital Central de Asturias tras o desaloxo por unha ameaza de bomba
Normalizada a situación no Hospital Central de Asturias tras o desaloxo por unha ameaza de bomba
Desaloxárase en parte o servizo de Urxencias, pero a inspección dos Tedax e de axentes con cans especializados en detección de explosivos non atopou nada
Volven recibir pacientes e xa están no centro os doentes leves e os familiares que tiveran que saír
Normalízase a atención no servizo de Urxencias do Hospital Universitario Central de Asturias, en Oviedo. O HUCA fora desaloxado en parte durante unhas tres horas por unha ameaza de bomba, que resultou ser falsa.
As autoridades sanitarias do Principado informan de que a inspección realizada por membros das forzas e corpos de seguridade do Estado non atopou ningún artefacto explosivo: nin nesa área, nin en ningunha das plantas de hospitalización. Tampouco no resto do complexo.
Con iso, volven recibir pacientes e regresaron os leves que foran desaloxados. Tamén están xa no centro os familiares que tiveran que abandonalo: parentes dos doentes que permaneceron no servizo por estaren máis graves, atendidos polo persoal imprescindible.
A Policía Nacional seguiu o protocolo para estes casos
A chamada coa ameaza de bomba recibíase pasadas as 22 horas e de inmediato se despregaba o dispositivo da Policía Nacional que decidía a evacuación parcial das Urxencias. Os axentes tomaron o aviso con seriedade malia a que lle deron escasa veracidade.
Tanto o presidente do Principado, Adrián García Barbón, como a Delegación do Goberno en Asturias chamaron á calma.
O Hospital Universitario Central de Asturias é o de referencia na comunidade veciña. Conta con arredor dun milleiro de camas.
