Desarticulada unha rede de estafas por venda fraudulenta de mascotas con 28 detidos en España e Colombia

A Garda Civil desmantelou unha rede de venda fraudulenta de mascotas que logrou en tres anos máis de 35 millóns de euros en transaccións con criptomonedas e ingresou máis de tres millóns de euros en efectivo nunha operación que se saldou con 28 detidos e outros 30 investigados en España e Colombia.

Atribúenselles 681 feitos delituosos, entre os que destacan 335 estafas, 158 de usurpación de estado civil, 95 de falsificación de documentos, 60 de branqueo de capitais ou 33 de ameazas e pertenza a organización criminal, aínda que as investigacións continúan abertas e estímase que poden alcanzar o milleiro pois só en España identificáronse xa 250 vítimas.

A operación Canmoney desenvolveuse de forma conxunta pola Garda Civil con Interpol e a Policía Nacional de Colombia, co que lograron desarticular esta rede dedicada a estafas a través de vendas de animais de compañía.

As estafas centrábanse na suposta venda de cans ofertados por uns 500 euros a través de diversos portais de compravenda e a investigación comezou tras unha denuncia por estafa na que se facía constar que, tras realizarse o pago pola compra dunha mascota, a mesma nunca se chegou a recibir.

Para gañar a confianza das vítimas os membros da organización enviaban documentos de identidade usurpados previamente obtidos doutras persoas estafadas e, tras recibir o primeiro pago, os presuntos vendedores esixían un segundo e se a vítima se negaba era ameazada de morte mediante mensaxes e chamadas telefónicas.

Un punto clave da investigación foi a implicación do propietario dun locutorio que aproveitaba a súa actividade laboral e coñecemento do sector para actuar como home de palla en España. Tanto el como a súa parella ingresaron uns tres millóns de euros mediante caixeiros automáticos e estes eran posteriormente enviados por centos de direccións de criptomonedas para dificultar o seu rastrexo, que eran operados por membros da organización situados en Colombia e Camerún, onde se atopaban os seus principais líderes.

Os axentes practicaron nove rexistros en España e tres en Colombia nos que, entre outros efectos, incautaron teléfonos móbiles utilizados para cometer as estafas e manter contacto coas vítimas, vehículos, computadores, máquinas contadoras de billetes, diñeiro, armas de fogo e documentación.