Detectan unha estafa na que piden cartos en nome da comisión de festas de Domaio
Xa presentaron denuncia na Policía Local e queren advertir que eles nunca piden fóra da súa parroquia
Na parroquia de Domaio, en Moaña, alertan dunha estafa que están levando a cabo en nome da comisión de festas. Din que dous homes están pedindo cartos na zona de Bueu para os festexos de San Bieito. Xa presentaron denuncia na Policía Local e queren advertir que eles nunca piden fóra da súa parroquia.
A chamada dunha veciña de Bueu foi a que puxo en alerta os membros da comisión de festas. Dous homes estaban pedindo cartos fóra da súa parroquia.
Dende a comisión din que é cedo para os donativos, a festa é en xullo e non empezan a pedir ata o mes de maio. Din, amais, que sempre van identificados.
Os organizadores alertaron os veciños, a través das redes sociais. Pídenlles que teñan coidado porque é unha estafa. A comisión de festas de San Bieito xa presentou denuncia na Policía Local de Moaña, que investiga agora o acontecido e tenta dar cos autores deste calote.
