Detida unha muller por agredir a súa filla de 20 anos no seu domicilio en Vigo

Unha muller de 52 anos foi detida este xoves de madrugada pola Policía Local de Vigo por un delito de violencia doméstica por agredir, presuntamente, a súa filla de 20 anos, que foi a que solicitou a intervención dos axentes.

A agresión produciuse pasada a medianoite na rúa Pino, onde a moza informou os axentes de que, "sen provocación previa", súa nai comezara a agredila. Así, relatou que a proxenitora lle propinara golpes na cara e na caluga e que, ao tratar de defenderse, suxeitouna fortemente das mans e tratou de botala do domicilio en que ambas conviven. A moza engadiu que as agresións eran frecuentes e que, aínda que nunca denunciara, si quería facelo nesta ocasión.

Os axentes observaron que presentaba feridas sanguentas nos beizos e eritemas no queixo e nos pulsos, polo que solicitaron asistencia médica para a moza, que foi trasladada ao punto de atención continuada da rúa Pizarro.

A suposta agresora asegurou aos policías que era a propietaria da casa e que a súa filla lla quería quitar. Os axentes detivérona pola suposta comisión dun delito de violencia doméstica.