Concentracións de repulsa polo crime machista de Moaña, cuxo suposto autor segue custodiado no hospital
Concentracións de repulsa polo crime machista de Moaña, cuxo suposto autor segue custodiado no hospital
Concentracións de repulsa polo crime machista de Moaña, cuxo suposto autor segue custodiado no hospital
O home xa fora condenado por violencia machista pola Audiencia Provincial de Pontevedra
O arrestado estaba no teito do vehículo que caeu ao mar e no que morreu Fadoua Akkar, de 41 anos
Veciños de Moaña concentráronse este domingo no salón de plenos do Concello para mostrar o seu rexeitamento e condena polo crime da muller que faleceu tras precipitarse ao mar á primeira hora da mañá do sábado no paseo de Domaio o vehículo no que circulaba xunto a un home que xa foi detido.
A concentración foi convocada polo propio Concello como sinal de rexeitamento e condena de "tan terrible acto". Alí, a alcaldesa, Leticia Santos, procedeu á lectura dun manifesto que deu paso a un aplauso que durou varios minutos.
Tamén en Pontevedra, cidade onde vivía e traballaba a vítima, concentráronse para condenar este crime.
Concentración de repulsa en Pontevedra
O home ao que se investiga por este presunto crime machista pasou a súa primeira noite detido no hospital. O seu coche caeu ao mar na madrugada do sábado no peirao de Moaña, o que provocou a morte da súa acompañante, Fadoua Akkar, unha muller de 41 anos.
O arrestado, que conducía o coche, foi rescatado con vida, trasladado ao hospital Povisa, en Vigo, con síntomas de hipotermia e finalmente detido. O subdelegado do Goberno en Pontevedra, Abel Losada, falaba horas antes de "indicios preocupantes" neste caso.
"Hai que ser moi prudente, porque a investigación está en marcha, pero o certo é que unha muller perdeu a vida ao precipitarse á auga un coche conducido por un home. E hai testemuñas que indican que o vehículo acelerou notablemente nunha zona peonil antes de caer á ría".
O investigado ten 47 anos, figura na base de datos do sistema Viogén de seguimento nos casos de violencia de xénero e mesmo chegou a ingresar en prisión tras ser condenado por uns "feitos violentos" pola Audiencia Provincial de Pontevedra no ano 2012.
"Tivo unha orde de afastamento vixente ata o ano 2020 con respecto á muller vítima daqueles feitos. A falecida é Fadoua Akkar, de 41 anos, de nacionalidade marroquí e con domicilio en Salcedo, Pontevedra. Esta muller non estaba rexistrada como vítima no sistema Viogén e por tanto non existía ningunha protección arredor dela", asegura Losada.
Unha particular daba a voz de alarma sobre as cinco da mañá. Avisaba as autoridades de que un turismo acababa de precipitarse ao mar preto do club de xubilados de Domaio. O corpo da muller foi atopado aboiando na agua durante as tarefas de retirada do vehículo.
Segundo fontes da investigación, a vítima presentaba un forte golpe na cabeza. A Garda Civil investiga o caso como un presunto crime machista. O detido permanece custodiado no centro hospitalario á espera de ser trasladado aos calabozos.
