Detido un home acusado de matar a tiros a súa exparella en Pasaia (Guipúscoa)

Unha muller morreu este sábado nunha vivenda de Pasaia (Guipúscoa) a consecuencia dos disparos efectuados presuntamente pola súa exparella. O suposto autor entregouse á Policía tras cometer o crime machista e permanece detido.

Segundo fontes do Departamento vasco de Seguridade, ocorreu pouco despois das 16:00 horas no interior dun piso do distrito de Pasai Antxo. As forzas de seguridade tentan agora esclarecer as circunstancias do acontecido.

Nun primeiro momento, o arrestado fuxiu do lugar nun vehículo, pero logo presentouse nas dependencias da Policía municipal de Villabona, a 20 quilómetros de Pasaia.