Detido un veciño de Ordes tras ser interceptado con 15 doses de haxix para a súa venda
Detido un veciño de Ordes tras ser interceptado con 15 doses de haxix para a súa venda
A operación Mosve permitiu desarticular o punto de venda de haxix máis activo da comarca
![](https://img-g24-crtvg.flumotion.com/prog24/2024/20240621/DETIDOORDESGARDACIVIL.png)
A Garda Civil detivo un mozo de 21 anos, veciño de Ordes (A Coruña), como presunto autor dun delito de tráfico de drogas tras ser interceptado con 15 doses de haxix no seu poder cando se dirixía a realizar unha venda.
Tal como informa a Benemérita, a operación, denominada Mosve, levou a cabo de maneira conxunta polo Posto de Ordes e polo Equipo de Investigación ROCA da Compañía de Santiago de Compostela, despois de iniciarse debido a unha actuación previa da Policía Local de Ordes.
A investigación comezou no mes de maio e terminou coa detención deste home no momento en que ía realizar unha entrega. Ademais, no seu domicilio, atopáronse 21 tabletas de haxix cun peso de máis de 2 quilos, sete pastillas de éxtase, 370 euros en billetes fraccionados, 640 bolsiñas para a preparación de doses, unha báscula de precisión e tres pistolas de aire comprimido.
Foi a Policía Local a que en maio comisou 60 gramos de haxix nun punto coñecido polo consumo e distribución de drogas polo miúdo. Este lugar era frecuentado por mozos, moitos deles menores de idade, o que xerou unha grande alarma social debido ao aumento do consumo de estupefacientes.
"O detido, coñecido por moitos mozos da zona e que abandonara os seus estudos hai varios anos, levaba un nivel de vida alto sen unha fonte legal de ingresos. Era frecuentemente visto en lugares coñecidos por ser puntos de encontro de potenciais compradores", indicou a Garda Civil.
A operación permitiu desarticular o punto de venda de haxix máis activo da comarca de Ordes. O detido foi posto ao dispor do Xulgado de Primeira Instancia número 1 da localidade.