Detidos dous candidatos socialistas de Mojácar pola súa implicación nunha presunta trama de compra de votos

A Garda Civil levaba semanas investigando o suposto intento de fraude electoral en Mojácar tras o aviso dun cidadán que denunciou que lle intentaran mercar o voto por correo.

Polo momento hai sete detidos, dous deles empresarios que van na lista do PSOE. Un de número dous e o outro no posto cinco. O PSOE xa suspendeu cautelarmente de militancia o primeiro. O outro non está afiliado. 

Juan Espadas, secretario xeral do PSOE de Andalucía, di: "Contundencia e claridade. Calquera situación deste tipo que se demostre é inxustificable en democracia e desde logo no Partido Socialista non ten cabida ningún tipo de conduta destas características".

O Partido Popular, que goberna con maioría absoluta en Mojácar, esixe unha investigación exhaustiva e que se depuren responsabilidades ante un feito que considera extremadamente grave.

Juan Manuel Moreno Bonilla, presidente de Andalucía, di: "O que pido é que as forzas de seguridade e a xustiza sexan determinantes, que cheguen ata o final, e por suposto que respondan aqueles que queiran alterar a vontade democrática".

O xulgado que leva o caso decretou segredo de sumario. Descarta que haxa relación coa trama de compra de votos de Melilla.

Alleo á compra de votos

Pola súa banda, o candidato do PSOE á alcaldía de Mojacar, Manuel Zamora, asegurou "ser absoluamente alleo á compra de votos" no concello en que compite por ser rexedor. Dixo que en ningún momento tivo coñecemento de ningunha irregularidade por parte do seu equipo.

Zamora puxo de manifesto a comisión de presuntos delitos por parte do Partido Popular que el mesmo se encargou de denunciar ante a Garda Civil.