Dezaoito persoas falecidas, entre elas nove nenos, polo derrubamento dun edificio en Alepo (Siria)

Un total de 18 persoas, entre elas nove nenos, morreron tras derrubarse un edificio de cinco plantas no que vivían unhas sete familias na provincia de Alepo, no noroeste de Siria.

Unha fonte do exército sirio dixo que os equipos de rescate concluíron as súas tarefas e contabilizaron un total de 18 cadáveres entre os entullos, mentres que socorreron catro feridos na derruba do edificio, en que habitaban unhas 35 persoas.

O Observatorio Sirio de Dereitos Humanos informou da morte de 15 persoas, entre elas un meniño acabado de nacer, oito nenos e cinco mulleres. A organización, con sede no Reino Unido pero cunha ampla rede de colaboradores sobre o terreo, dixo que as persoas que perderon a vida no colapso eran desprazadas da cidade de Afrin, situada no extremo noroeste de Siria, arrebatada en 2018 ás forzas kurdas por tropas turcas e as súas milicias aliadas.

As autoridades sirias atribuíron o colapso a "unha filtración de auga nos cimentos do edificio", situado en Sheikh Maqsoud, unha área baixa control das Forzas de Siria Democrática (FSD), unha alianza liderada por kurdos e apoiada polos Estados Unidos.

O comandante das FSD Mazlum Abdi arremeteu contra Damasco polo colapso do edificio, debido a que "durante anos" o Goberno sirio "impediu a entrada de materiais básicos ao barrio e evitou calquera esforzo para devolverlle a vida e a estabilidade", dixo en Twitter. O pasado setembro, once persoas morreron noutro derrubamento dun edificio residencial en Alepo, que foi bombardeado violentamente con bombas de barril e mísiles a finais de 2016.

Segundo o Observatorio, debido á pobreza e as malas condicións de vida no país, miles de familias viven en edificios residenciais deixados en ruínas polos bombardeos e ataques aéreos durante a guerra que sacode Siria desde 2011. (Axencia EFE)