Día Mundial da Abella: unha especie esencial para a supervivencia humana
Día Mundial da Abella: unha especie esencial para a supervivencia humana
Tres de cada catro cultivos que se producen para a alimentación humana dependen do labor de polinización que fan as abellas, unha especie actualmente ameazada
No Día Mundial das Abellas, os expertos advirten dos perigos para a supervivencia desta especie tan importante para a humanidade, desde as velutinas ao cambio climático
Os apicultores galegos confirman un problema que se vén consolidando ano tras ano: a mortaldade das abellas.
Luis Portabales, apicultor: "Unha mortaldade dun 30 % considerámola un éxito, cando en tempos era unha mortaldade grande".
Os factores son múltiples, varias frontes abertas contra as que loitar, desde as especies invasoras, como a velutina, ás pragas cada vez máis resistentes, como a varroa, un ácaro que debilita o sistema inmunolóxico das abellas. O uso de pesticidas, os monocultivos en intensivo e o cambio climático tamén se suman á lista.
"De repente, quince días de chuvia sen que poidan saír recoller, provoca que teñamos que alimentalas nós", explica Luis.
Máis alá das perdas para os apicultores, advirten os expertos, a redución na poboación da abellas é un problema para a humanidade no seu conxunto pola súa función como polinizadoras.
Mónica López Pérez, técnica da Agrupación Apícola de Galicia: "Os cultivos benefícianse desta polinización, as froiteiras, as hortas...".
No Día Mundial das Abellas, instaurado pola ONU para protexelas, lémbrannos tamén que non é só mel o que producen.
"Hai pole, propóleo, a cera é moi utilizada non só para facer candeas, senón tamén para cosmética, a xelea real...", enumera Mónica.
A mensaxe deste ano vai dirixida á poboación moza, para inspirar futuros líderes ambientais.
.png)
