Día Mundial do Párkinson: "É duro aceptalo, pero facelo axuda moito a levar a enfermidade"
Día Mundial do Párkinson: "É duro aceptalo, pero facelo axuda moito a levar a enfermidade"
Lanzan a primeira campaña creada 100 % con intelixencia emocional
Estímase que en Galicia esta doenza afecta máis de 13.000 persoas
Susana ten 59 anos e diagnosticáronlle párkinson hai sete. "Foi moi duro. Amais eu tiña síntomas que ao mellor outras persoas non lles fan caso, pero eu, ao ser médico, xa me facía unha idea", di esta muller, paciente e vogal da xunta directiva da Asociación de Párkinson Galicia-Coruña.
Lolita soubo que sufría esta enfermidade crónica e neurodexenerativa hai case unha década. O seu sentimento foi similar.
"É duro aceptalo. Pero aceptalo axuda moito a levar a enfermidade. Eu era remisa a ir á asociación e oxalá fora antes porque axúdante moito en todo. E a familia tamén foi clave", comenta Lolita Martínez.
"A min operáronme en novembro e grazas a iso xa non teño que tomar nada para a dor", engade Susana Amaro.
Porén o que lles segue doendo é a falta de información que hai na rúa. "Hai situacións que doen. Eu un día ía no bus, cheo, ninguén se ergue para deixarme o asento. Pero a iso xa estou afeita. O peor foi cando unha señora lle di a outra: fíxate nesa muller... como treme e non para de mover as pernas. Eu mirei para ela, sorrinlle e o meu sentimento foi de pena cara a ela", conta Lolita Martínez.
"Levamos moito camiño andado, pero aínda queda moito por percorrer. E por iso este ano lanzamos a primeira campaña creada cen por cento con intelixencia emocional. Defendemos que coñecer, conectar e compartir o proceso persoal do párkinson axuda a mellorar a calidade de vida dos doentes", explica Mila Oreiro Rodríguez, directora da Asociación Párkinson Galicia-Coruña.
A súa prevalencia duplicouse nos últimos 25 anos e estímase que en Galicia afecta máis de 13.000 persoas.
