Diego Epifanio: "Está fóra de toda dúbida o compromiso do vestiario"
O Leyma xoga ante un Valencia que é terceiro na clasificación da Liga Endesa, cun balance de 17 vitorias e só 6 derrotas
Diego Epifanio, adestrador do Leyma Básquet Coruña, destacou este xoves o gran momento de forma que atravesa o Valencia Basket, ao que visita este sábado na Fonteta.
"É un equipo que fai moitísimas cousas ben, ademais de ter un plantillón e un grande adestrador. Son un bloque moi sólido, o equipo que máis puntos mete, o de mellor valoración, o que máis rebotea. Ademais, creo que mellorou en todos os logaritmos respecto á primeira volta", sinalou en rolda de prensa.
Para o técnico laranxa, o cadro dirixido por Pedro Martínez "funciona como un rodete" porque "en defensa téñeno todos moi claro, máximo esforzo e máxima implicación, e en ataque fano moi fácil".
"Evidentemente as súas porcentaxes de tres axudan moito a seguir crendo nesa forma de xogar. Creo que é un equipo que xoga moi ben, moi sinxelo. É un equipo moi bonito de ver porque ten os conceptos moi claros", subliñou.
Epifanio asume que as opcións de sorpresa na Fonteta pasarán por rozar a perfección porque "eles na súa casa compiten excelentemente ben".
Epi sinala que o equipo non é alleo á difícil situación que pasa.
"Estamos nun momento complicado, últimos e a tres vitorias da salvación. Pero aí é onde temos que mostrar a nosa profesionalidade. Está fóra de toda dúbida o compromiso de todas as persoas de dentro do vestiario".
O Valencia é terceiro na clasificación da Liga Endesa, cun balance de 17 vitorias e só 6 derrotas, mentres que o Básquet Coruña é pechacancelas despois de gañar unicamente cinco partidos nas primeiras 23 xornadas.
