Filipe VI lembra os afectados pola dina e pide serenidade na contenda política

Filipe VI pronunciou este martes á noite o seu tradicional discurso de Noiteboa, no que a traxedia da DINA ocupou un lugar destacado.

No balance dun ano en que se celebrou o décimo aniversario da súa proclamación, o rei fixo tamén un chamamento ao consenso na escena pública, non para impedir a diversidade de opinión, senón para fortalecer o espazo compartido.

A inestabilidade internacional, o acceso á vivenda e  a xestión da inmigración foron outros dos temas que centraron o discurso.

Filipe VI apelou ao recoñecemento á dignidade que merecen todas as persoas para abordar a inmigración, sen esquecer a loita contra as mafias.

A dificultade de acceder a unha vivenda para a xente máis nova foi outro dos asuntos reflexados no discurso. O rei apelou a un diálogo entre todos os actores implicados que facilite á xente moza formar un fogar.

Sobre a política exterior, Filipe VI fixo un chamamento a que España e a Unión Europea sigan defendendo a democracia. Europa segue sendo a nosa referencia máis valiosa, dixo o rei. E dentro de España, o rei fixo un chamamento ao respecto á Constitución.

"A pesar do tempo transcurrido segue sendo o noso gran alicerce", dixo Filipe VI.

O rei defendeu un pacto de convivencia e demandou serenidade na escena pública e política. 

A reforma do artigo 49 da Constitución referido ás persoas con discapacidade é un exemplo, dixo o rei.

"España é un gran país", dixo o rei, un país que aínda ten moito que facer pero que ve con optimismo o futuro grazas a unha situación económica que mellora e a un potencial que nos debe infundir confianza, dixo o monarca.

O rei referiuse tamén aos logros deportivos do noso país e á esperanza na xuventude.

Filipe VI rematou o discurso navideño lembrando o que aínda queda por facer nos lugares afectados pola dina,  apelando a que se manteña a solidariedade cos afectados e desexando boas festas en éuscaro, catalán e galego.

As dez frases máis destacadas do discurso

Estas son as dez frases máis destacadas das 1.806 palabras que compuxeron o discurso televisado do monarca:

.- "É necesario que a contenda política, lexítima, pero en ocasións atronadora, non impida escoitar unha demanda aínda máis clamorosa: unha demanda de serenidade".

.- "Non podemos permitir que a discordia se converta nun constante ruído de fondo que impida escoitar o auténtico pulso da cidadanía".

.- "O consenso ao redor do esencial, non só como resultado, senón tamén como práctica constante, debe orientar sempre a esfera do público".

.- "Volvo a todos os municipios e comarcas afectados polas riadas, en moitos dos cales aínda queda tanto por facer, onde é tanta a necesidade dos veciños que deixa pequenos todos os esforzos, aínda sen perder a esperanza".

.- "Que as axudas cheguen a todos os que o necesiten, para que poidan reconstruír o futuro polo que tanto loitaron, afrontando con coraxe e dignidade os retos dun presente ás veces implacable".

.- "O esforzo de integración, que corresponde a todos, o respecto –tamén de todos– das leis e normas básicas de convivencia e civismo, e o recoñecemento da dignidade que todo ser humano merece, son os piares que deben guiarnos á hora de tratar a inmigración".

.- "É importante, de novo, que todos os actores implicados reflexionen, escoiten uns a outros, que se examinen as distintas opcións e que sexa ese diálogo conduza a solucións que faciliten o acceso á vivenda en condicións asumibles, en especial para os máis novos e os máis desprotexidos".

.- "É responsabilidade de todas as institucións, de todas as administracións públicas, que esa noción do ben común se siga reflectindo con claridade en calquera discurso ou calquera decisión política".

.-"A nosa vida vese afectada tamén por un escenario exterior cada vez máis complexo e cambiante –e mesmo convulso. Vemos tamén, mesmo, como se chega a discutir a mesma validez da democracia como sistema de goberno".

.- "España é un gran país. Unha nación cunha historia portentosa, a pesar de os seus capítulos escuros, e modélica no desenvolvemento democrático das últimas décadas, derrotando incluso o acoso terrorista que tantas vítimas causou".