Efectos da DANA: rúas anegadas, estradas cortadas e persoas atrapadas nas casas e coches
Efectos da DANA: rúas anegadas, estradas cortadas e persoas atrapadas nas casas e coches
O temporal obriga a cortar os trens entre Cataluña e a Comunidade Valenciana
O alcalde de Madrid pediulles aos cidadáns que non saian da casa
A Liga suspende o partido entre o Atlético e o Sevilla ante as previsións
A depresión atmosférica illada en niveis altos (DANA), que desde o sábado puxo en alerta boa parte do país ante o risco de choivas torrenciais, provocou xa inundacións, rescates a persoas atrapadas nas súas vivendas ou nos seus vehículos, o peche de estradas, a suspensión de servizos de tren e o desvío dun voo.
Toledo e Madrid, ademais de Cádiz, están desde este domingo en alerta vermella polas fortes choivas que poderán chegar a acumular máis de 120 litros de auga por metro cadrado, segundo advertiu este domingo a Axencia Estatal de Meteoroloxía (Aemet), que ademais activou a alerta laranxa noutras zonas de Andalucía, en Castela e León, en Cataluña e na Comunidade Valenciana.
En Madrid, o alcalde da capital, José Luis Martínez-Almeida, pediulles aos cidadáns que "permanezan nos seus domicilios salvo que sexa imprescindible que teñan que facer un desprazamento", dada a situación "excepcional e anómala", pois previsiblemente se bata o récord histórico de precipitacións, que, segundo lembrou o edil, data de 1972, cando se acumularon 87 litros por metro cadrado.
Interrompeuse o tráfico ferroviario de Madrid con Xaén, Albacete e Almería.
Efectos nas estradas
As abondosas precipitacións con treboadas que regaron todo o país, dificultan o proceso de operación retorno do verán, con tráfico intensificado e recomendacións por parte das axencias de seguridade e emerxencias de non viaxar ou de adiantar o regreso para evitar estar na estrada durante a tarde.
A cantidade de choiva acumulada na calzada afectou no que vai de xornada a diferentes estradas da rede secundaria: en Castelló cortouse a N-340 en Vinaròs; en Valencia, a V-31 en Silla; en Tarragona a T-331 e a C12 en Tortosa, a N-340 en Alcanar e a TV-3443 en Amposta, confirmaba a DXT. En Toledo, na CN-15, a N-410 en Tembleque e na TO-3077 en Villacañas.
Pola súa banda, Protección Civil recomendou conducir con precaución, reducir a velocidade e ter en conta o lugar onde se aparca, pois "o rápido ascenso do nivel das augas pode danar os vehículos aparcados sobre zonas inundables e, ademais, arrastralos, provocando danos a bens alleos e mesmo obstaculizar o fluxo natural da corrente", advertiu nun comunicado.
Tamén na Comunidade Valenciana se produciron rescates a persoas que quedaran atrapadas nos seus vehículos, e resolvéronse outras incidencias como caídas de árbores, conatos de incendios por raios ou achiques.
Na provincia de Castelló acumuláronse o sábado 189 litros de auga por metro cadrado na localidade de Borriol; en Vilafamés acumuláronse 158,8 litros; 130,6 na Pobla de Tornesa; 107 en Betxí e 101 en Tírig.
Así mesmo, en Valencia as fortes choivas causadas pola pinga fría afectaron especialmente o municipio de Alzira, que ao longo da noite alcanzou os 175 litros por metro cadrado acumulados, así como a Alginet, con 131,4 litros por metro cadrado ou Algemesí, con 126,2 litros.
En Aragón, a DANA deixou rúas asolagadas nas localidades zaragozanas de Tauste, Gallur e Pedrola, onde cinco persoas quedaron illadas en dúas vivendas polos estragos causados polas choivas.
Ademais, un AVE con 52 pasaxeiros viuse obrigado a parar o sábado entre Rueda de Jalón e Plasencia de Jalón, e un avión procedente de Italia que ía aterrar en Zaragoza tivo que facelo no aeroporto de Xirona pola meteoroloxía adversa.
En Huesca, tamén o sábado dous barranquistas perderon a vida, e a Garda Civil informa de que é posible que morresen por afogamento debido ao “elevado e forte” caudal do barranco de Gorgol, malia que as causas aínda se están investigando.
Nas Baleares, o temporal ocasionou ata as 11:30 horas deste domingo 25 incidentes leves atendidos polo centro de coordinación de emerxencias 112. A maioría producíronse en Eivisa, con 5 emerxencias en Santa Eulària, 4 en Vila e 4 en Sant Josep, mentres que en Mallorca foron 4 incidentes en Palma, 2 en Calvià e 1 en Bunyola, Algaida, Felanitx, Fornalutx e Llucmajor.
En Cataluña, os Bombeiros da Generalitat atenderon unha quincena de incidencias ao longo do sábado, cando as choivas afectaron especialmente a zonas de Tarragona como Alcanar, localidade onde nas últimas 24 horas se acumularon 215,7 litros por metro cadrado e Protección Civil pediulles aos veciños que se confinen nas súas vivendas.
En Cuenca, a Garda Civil rescatou este sábado unha anciá que quedara atrapada na súa vivenda en Buenache de Alarcón, onde a auga superou o metro e medio de altura, como sinalaron os integrantes do operativo, que lle axudaron a saír de entre o mobiliario e os obxectos polos que quedara practicamente cuberta.
En Estremadura, a cidade máis afectada polas tormentas foi Mérida, onde os bombeiros do parque municipal non deron abasto para achicar auga e retirar ramas en distintos puntos da cidade.
Por mor das intensas choivas e as inundacións suspendeuse o concerto que o cantante Juanes tiña previsto ofrecer o sábado á noite no Teatro Romano de Mérida, dentro do STONE & MUSIC Festival, aínda que o colombiano terminou interpretando tres cancións no exterior do hotel onde se aloxaba.
![](https://img-g24-crtvg.flumotion.com/prog24/2023/20230903/efectosdaDanaVehiculos.png)